زاڭسىز ساقتالعان قارۋدى ساتىپ الۋ اكسياسى باستالدى

قارۋ-جاراق زاتتارىن ەرىكتى تۇردە تاپسىرعانى ءۇشىن ءار بىرلىككە 34 مىڭ تەڭگەدەن 345 مىڭ تەڭگەگە دەيىن تولەم كوزدەلگەن.

ىشكى ىستەر مينيسترلىگىنىڭ حابارلاۋىنشا، بىلتىر قازاقستاندىقتاردان 1400 بىرلىك اتىس قارۋى، 10 مىڭنان استام پاتروندار ساتىپ الىنعان. ول ءۇشىن ازاماتتارعا 89 ملن تەڭگە تولەندى، دەپ حابارلايدى Almaty-akshamy.kz 24.kz-كە سىلتەمە جاساپ. 

ءتارتىپ ساقشىلارىنىڭ سوزىنشە، بۇل شارا ەلدەگى كريمينوگەندىك احۋالعا وڭ سەپتىگىن تيگىزەدى. ماسەلەن، كەيىنگى 5 جىلدا قارۋلى قىلمىس سانى 50%-كە دەيىن ازايعان.

«زاڭسىز ساقتالعان قارۋ-جاراق زاتتاردى ەرىكتى تۇردە وتەمدى تاپسىرۋعا نيەت بىلدىرگەن ازامات، ەگەر ونىڭ ارەكەتتەرiندە وزگە قۇقىقبۇزۋشىلىق قۇرامى بولماسا، قىلمىستىق جانە اكىمشىلىك جاۋاپكەرشىلىكتەن بوساتىلاتىنىن ايتا كەتۋ قاجەت»، - دەيدى  ق ر ءىىم اكىمشىلىك پوليسيا كوميتەتى قارۋ اينالىمىن باقىلاۋ ءبولىمىنىڭ باستىعى اسىلبەك ىدىرىسوۆ.

تاپسىرۋعا نيەت بىلدىرگەن ازامات كەز كەلگەن اۋماقتىق پوليسيا ورگانىنا ءوتىنىش بەرە الادى. ءوتىنىشتى تىكەلەي پوليسيا ورگاندارىنىڭ كەزەكشى بولىمدەرىنە بەرۋگە بولادى نەمەسە تەلەفون ارقىلى جۇگىنگەن كەزدە اتالعان زاتتاردىڭ ورنالاسقان جەرىنە بارلىق قاجەتتى ءىس-شارالاردى جۇرگىزەتىن پوليسيا قىزمەتكەرى جولدانادى.