زاڭسىز قوقىس پوليگونىنا قاتىستى زاڭنامانى قاتاڭداتۋ ماسەلەسى قاراستىرىلۋدا.
بەلگىلەنبەگەن جەرگە قوقىس توككەن ازاماتتار ءۇشىن ايىپپۇل مولشەرىن 69 مىڭ تەڭگەدەن 345 مىڭ تەڭگەگە ۇلعايتۋ كوزدەلىپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
بيىل ەل كولەمىندە 3 مىڭنان استام زاڭسىز قوقىس الاڭدارى انىقتالدى. جاۋاپتى ماماندار ۇيىندىلەر سانى جىل ساناپ ازايىپ كەلە جاتقانىن ايتادى. زاڭ قاتايسا، تاعى كەمي تۇسەتىنى انىق دەيدى ولار. تاقىرىپتى ءتىلشى نۇرقانات قاناپيا تارقاتادى.
نۇرقانات قاناپيا، ءتىلشى: - ءبىز ءقازىر الاش تراسساسىنىڭ بويىنداعى زاڭسىز قوقىس پوليگونىندا تۇرمىز. ال ونىڭ ءدال ىرگەسىندە زاڭداستىرىلعان، شارباقپەن قورشالعان قوقىس پوليگونى جاتىر. الايدا، تۇرعىنداردىڭ ول جەرگە قوقىس تاستاۋعا قۇلقى جوق. سەبەبى وعان اقشا تولەۋى كەرەك. ءار تەكشە مەترىنە – 3800 تەڭگە. ال مۇندا قانشا لاقتىرساڭىز دا ءوز ەركىڭىز.
پوليگون ىرگەسىندەگى بۇل الاڭعا قاتتى قالدىقتاردى توگۋگە استانا اكىمدىگىنىڭ ءوزى رۇقسات بەرگەنىن اكىمدىك مامانى راستادى. جۇك كولىكتەرى پوليگون قاقپاسى ارقىلى كىرىپ، تارازىعا تۇرادى. ەكوبەلسەندىلەردىڭ ايتۋىنشا، قازىرگى ۋاقىتتا سايعا 12 مىڭ توننادان استام قوقىس جينالعان.
ايدىن ەسەنبەك، استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باس مامانى: - ءيا، بۇگىنگى تاڭدا اكىمدىك ول جەردە ۋاقىتشا پوليگون ۇيىمداستىردى. قۇرامى ءارتۇرلى قوقىستى اۋەلى سول جەرگە جيناپ الىپ، كەيىن سۇرىپتايمىز. قۇرىلىس قالدىقتارىن «سيەۆەرنايا گريادا» پوليگونىنا جونەلتەمىز. تۇرمىستىق قالدىقتار قايتا وڭدەۋدەن وتەدى.
«عارىش ساپارى» زەرتتەۋلەرىنە سۇيەنسەك، بيىل ەلوردا اۋماعىنان 253 ءىرى زاڭسىز قوقىس الاڭى انىقتالدى. شاعىندارىن ەسەپكە السا، 500-دەن اسادى. باسقارما وكىلى 78 ءۇيىندى جويىلعانىن ايتادى. 55 توننا قوقىس شىعارىلعان. بۇلاردىڭ باسىم بولىگى – ەسىلدىڭ سول جاعالاۋىندا.
شاساليم شاگاليموۆ، ەكوبەلسەندى: - "عارىش ساپارى" مالىمەتى بويىنشا قالادا قۇرىلىس جانە باسقا دا قوقىس ۇيىندىلەرى ۇلكەن پروبلەماعا اينالعانىن كورىپ وتىرمىز. بىلتىر استانادا 551 قوقىس ءۇيىندىسى انىقتالدى.
بيىل اكىمدىك 280 ءۇيىندى جويىلعانىن ايتتى. دەگەنمەن، ءالى دە قالانىڭ كەز كەلگەن تۇسىنان قوقىس ۇيىندىلەرىن وڭاي كەزىكتىرۋگە بولادى. زاڭنامانى قاتاڭداتۋ ماسەلەسى قاراستىرىلۋدا. ماسەلەن، ءقازىر زاڭبۇزۋشى جازاعا تارتىلعانىمەن توككەن قوقىسىن جيناپ اكەتۋگە مىندەتتى ەمەس. ءۇيىندىنى جويۋ ءىسى – جەرگىلىكتى اتقارۋشى بيلىكتىڭ موينىنا جۇكتەلەدى. سونداي-اق، ايىپپۇل مولشەرىن 69 مىڭ تەڭگەدەن 345 مىڭ تەڭگەگە ۇلعايتۋ دا كوزدەلىپ وتىر.
الماز ىسقاقوۆ، ق ر ەترم ەكولوگيالىق رەتتەۋ جانە باقىلاۋ كوميتەتىنىڭ باس مامانى: - ءقازىر اكىمشىلىك قۇقىق بازاسىنا قاتاڭداتۋ جۇمىستارى اياقتالعاننان كەيىن اتالعان قوقىستار تاعى ازايادى. مۇمكىن جويىلاتىن شىعار دەگەن ءۇمىت بار. تاسىمالداۋشىلار وزدەرى تاستاعان قوقىستارىن وزدەرى جيناپ، ايىپپۇل سالىنىپ، ال ەگەر دە قايتالانعان جاعدايدا ماشيناسىن ستويانكاعا سالۋ قاراستىرىلاتىن بولادى.
بىلتىر جەلتوقسان ايىندا پرەمەر-مينيستر ءاليحان سمايىلوۆ 1 ماۋسىمعا دەيىن بارلىق اكىمدىكتەرگە زاڭسىز قوقىس پوليگوندارىن تولىق جويۋ تۋرالى تاپسىرما بەردى. بۇگىنگە دەيىن ەل كولەمىندە 3 مىڭنان استام قوقىس ورنى انىقتالىپ وتىر. قازىرگى تاڭدا ولاردىڭ تەك مىڭنان استامى عانا جويىلعان.