سوڭعى جىلدارى بۋكمەكەرلىك كەڭسەلەر سانى ەكى ەسەگە ازايدى.
بيىل رەسپۋبليكا بويىنشا 3 670 زاڭسىز ونلاين-كازينو بۇعاتتالعان، دەپ حابارلايدى Almaty-akshamy.kz مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
ەگەر 2021 جىلدىڭ باسىندا ەلىمىزدە 38 بۋكمەكەرلىك كەڭسە بولسا، بۇگىندە ولاردىڭ سانى – 16، ال ءىس جۇزىندە جۇمىس ىستەيتىندەرىنىڭ سانى – 12.
"مينيسترلىك بۋكمەكەرلىك كەڭسەلەر مەن ويىن بيزنەسىنىڭ باسقا دا نىساندارىنىڭ زاڭ نورمالارىن ساقتاۋىن مۇقيات قاداعالايدى. ماسەلەن، وسى جىلدىڭ باسىنان مينيسترلىك سوت تارتىبىمەن ويىن بيزنەسى سالاسىنداعى 7 ليسەنزيانىڭ قولدانىلۋىن توقتاتتى. وسىعان ۇقساس تاعى 7 ۇيىمعا قاتىستى جۇمىس اتقارىلىپ جاتىر. سونداي-اق ينتەرنەتتە دە مونيتورينگ جۇرگىزىلەدى. بيىل 3670 زاڭسىز ونلاين-كازينو بۇعاتتالدى"،- دەدى مادەنيەت جانە سپورت ۆيسە-مينيسترى ەرجان ەركىنبايەۆ.
ۆەدومستۆو اقپاراتىنشا، مينيسترلىك ءتۇسىندىرۋ ارقىلى جانە سوت تارتىبىمەن بۋكمەكەرلىك كەڭسەلەردىڭ سانىن ازايتۋ بويىنشا جۇمىس جۇرگىزەدى. مىسالى، سوڭعى ءۇش جىلدا بۋكمەكەرلىك كەڭسەلەر 15 ليسەنزيانى ءوز ەركىمەن تاپسىرعان.
ال وسى جىلدىڭ باسىنان سوت شەشىمىمەن 5 بۋكمەكەرلىك كەڭسە جابىلدى، ولاردىڭ جۇمىسى قولدانىستاعى زاڭناما نورمالارىنا سايكەس كەلمەدى. قازىرگى ۋاقىتتا تاعى 3 بۋكمەكەرلىك كەڭسەگە قاتىستى ليسەنزيالاردىڭ كۇشىن جويۋ جۇمىسى ءجۇرىپ جاتىر.
قازاقستانداعى ويىن بيزنەسى سۋبەكتىلەرىنىڭ جالپى سانى دا ازايىپ جاتىر. سوڭعى 5 جىلدا ولار 2،5 ەسە ازايعان. ەگەر 2018 جىلى 97 بولسا، بيىل ولاردىڭ سانى 38 بىرلىكتى قۇرايدى.