دۇنيەگە كەلگەن ساتتەن باستاپ ءومىرىڭنىڭ سوڭعى كۇنىنە دەيىن كۇرەسىپ وتەسىڭ. ءاربىر باسقان قادامىڭا سەنىمدى بولۋ ءۇشىن بۇگىنگى كۇنى ءبىلىمىڭ جەتىك بولۋى ءتيىس. وسىنداي قاربالاس زاماندا ءوز قۇقىعىمىزدى قورعاي الماي جاتاتىندىعىمىز وتىرىك ەمەس.
بۇگىنگى كۇنى ۇلكەندەر: «شاماڭ كەلسە، زاڭدى وقىپ. سوندا عانا وزگەگە جەم بولمايسىڭ» - دەپ جاتادى. ءوز قۇقىعىن بىلمەگەندىكتەن جوق جەردە وپىق جەپ جاتقاندار از ەمەس. بۇل قۇقىقتىق ساۋاتسىزدىقتان دەپ بىلەمىن.
جۇمىسسىزدىق جايى بۇگىنگى كۇنگى ماسەلەلەرىنىڭ ءبىرى. ارمان قالا الماتىعا وقۋ، جۇمىس ىزدەپ كەلىپ، قۇر الاقان قايتىپ جاتقان ادام سانىنان گورى الدانىپ جاتقاندار كوبىرەك. ستۋدەنتتەر اراسىندا تاجىريبەنى ءبىر اي ءوتىپ، جۇمىسقا الىنباي، كوك تيىنسىز قالىپ جاتاتىندارى دا بار. مۇنداي جاعدايلارلاردا ءاربىر ازامات ءوز قۇقىعىن، ەڭبەك زاڭىن بىلمەي جاتسا، جاعداي تەك قيىنداي تۇسەدى.
گازەت-جۋرنال بەتتەرىنەن زاڭ مەن قىلمىسقا بايلانىستى ماقالانى وقىپ، بايىبىنا بارىپ جاتقاندار ساناۋلى شىعار. ازاماتتىق قۇقىعىمىزدى قانشا تاپتاپ جاتسا دا تاباندىلىق كورسەتەتىندەر از. كەي كەزدەرى قازاققا ءتان «ۇيات» جىبەرمەي قالاتىن كەزدەر بولادى.
جاقىندا قازۇۋ-دىڭ زاڭ فاكۋلتەتى ازاماتتىق قۇقىق جانە ازاماتتىق ءىس جۇرگىزۋ، ەڭبەك كافەدراسىنىڭ اعا وقىتۋشىسى كاراشيەۆا جانار اپايىمىزدىڭ «اقىلى قىزمەت كورسەتۋ شارتىنىڭ قالىپتاسۋ نەگىزدەرى» اتتى ماقالاسىن وقىدىم. اۆتور ءوزىنىڭ جۇمىسىندا اقىلى قىزمەت كورسەتۋ شارتىن انىقتاۋ جانە دامۋ زاڭدىلىقتارىن قاراستىرادى.
ازاماتتىق قوعام ينستيتۋتتارىنىڭ جان-جاقتى دامۋى، مەملەكەت پەن قوعام قاتىناستارىنىڭ ۇيلەسىمدىلىگى باعدارىنىڭ ناتيجەسىندە مەملەكەتتىك جانە قوعامدىق ينستيتۋتتاردىڭ نەعۇرلىم بەلسەندى ءوزارا ءىس-قيمىلىنا كونستيتۋسيالىق تىيىمدار مەن شەكتەۋلەر الىپ تاستالعاندىعى جانە سونىڭ ناتيجەسىندە بۇگىندە ءبىزدىڭ ەلدىڭ ىشكى جاعدايى مەن قاجەتتىلىكتەرىنە تولىقتاي ساي كەلەتىن جەرگىلىكتى ءوزىن-وزى باسقارۋ جۇيەسى جاڭارتىلعاندىعىن ايتىپ كەتكەن بۇل ەڭبەكتىڭ بايىبىنا بارا بىلسەڭ، قۇقىق سالاسىنان ساۋاتىڭ ءبىراز اشىلادى. وتباسى قۇقىعى، بۇگىنگى كۇنى بەلەڭ الىپ كەلە جاتقان جاس وتباسىلاردىڭ اراسىنداعى اجىراسۋ ماسەلەسى، ورتاق مۇلىكتى ءبولۋ ماسەلەلەرى، بالالاردىڭ قۇقىقتارى جونىندە جازىلعان ماقالادان وزىمە قاجەت ءبىراز وي ءتۇيدىم. قاشان دا ەڭسەڭدى تىك ۇستاۋ ءۇشىن جان-جاقتى بولعان دۇرىس ەكەن. ەڭبەك تارتىبىنە بايلانىستى تۋىنداعان داۋلاردى شەشۋ جولىندا ءوز قۇقىعىن قورعاي بىلۋگە قاتىستى حۋدايبەردينا گۇلنۇر ۇستازىمىز كوپتەگەن ماسەلەلەردى اشىپ جازعان. ماقالانى وقۋ بارىسىندا ءوز - وزىڭە سەنىمدىلىك پايدا بولاتىنىنا كوزىم جەتتى. سەبەبى ءوز قۇقىعىن بىلگەن ادام جايدان-جاي وزگەنىڭ دەگەنىنە كونە قويمايدى.