ءبىرقاتار وزگەرىس جاسالدى.
زاڭ قابىلداۋ قۇقىعى ماجىلىسكە تيەسىلى بولادى. بۇل تۋرالى كونستيتۋسيالىق كەڭەستىڭ اپپارات جەتەكشىسى باقىت نۇرمۇحانوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«زاڭ شىعارۋ پروسەسىن جاڭعىرتۋعا ارنالعان ءبىرقاتار وزگەرىس جاسالدى. زاڭ قابىلداۋ قۇقىعى نەگىزىنەن ماجىلىسكە تيەسىلى بولادى. سەناتقا ءماجىلىس قابىلداعان زاڭداردى ماقۇلداۋ نەمەسە ماقۇلداماۋ قۇقىعى بەرىلەدى. رەتتەيتىن ماسەلەلەردىڭ ماڭىزدىلىعىن ەسكەرە وتىرىپ، كونستيتۋسيالىق زاڭداردى پالاتالاردىڭ بىرلەسكەن وتىرىسىندا قابىلداۋ قولداۋ تاپتى. ۇكىمەتكە ادام ءومىرى مەن دەنساۋلىعىنا، مەملەكەتتىڭ قاۋىپسىزدىگىنە، باسقا دا قۇندىلىقتارعا ايرىقشا ءقاۋىپ تونگەن جاعدايدا زاڭ كۇشى بار نورماتيۆتىك-قۇقىقتىق اكتىلەر قابىلداۋ قۇقىعى بەرىلدى»، - دەدى ول ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، ەلىمىزدىڭ اتا زاڭىنا ەنگىزىلەتىن تۇزەتۋلەر مەن وزگەرتۋلەر جوباسىنىڭ اۋقىمدى بولىگى ادام قۇقىقتارى ماسەلەلەرىنە ارنالعان.
«بىلتىر قازاقستاننىڭ قىلمىستىق كودەكسىنەن جانە باسقا زاڭدارىنان ءولىم جازاسى الىنىپ تاستالدى. ەندى بۇل ۇعىم اتا زاڭنان جويىلىپ وتىر. وسىلايشا، ءبىز قازاقستان ءىس جۇزىندە دە، زاڭ جۇزىندە دە ءولىم جازاسى جوق مەملەكەت دەپ ايتا الاتىن بولامىز. ومبۋدسمەن ينستيتۋتى تۋرالى جەكە باپ قاراستىرىلدى. ازاماتتاردىڭ ءوتىنىش بەرۋىنە جول اشىپ، كونستيتۋسيالىق كەڭەستى كونستيتۋسيالىق سوتقا اينالدىرۋ باستاماسىن ەرەكشە اتاپ وتكىم كەلەدى. كونستيتۋتسيالىق سوت تورەلىگى بويىنشا دۇنيەجۇزىلىك قاۋىمداستىققا مۇشە 118 ەلدىڭ 78-ىندە كونستيتۋسيالىق سوت قۇرىلعان. 12 مەملەكەتتە كونستيتۋتسيالىق كەڭەس جۇمىس ىستەيدى. قالعاندارىندا بۇل فۋنكسيانى جوعارعى سوت جانە باسقا ورگاندار جۇزەگە اسىرادى. وسى ورايدا قازاقستان الەمدە ەڭ كەڭ تاراعان جانە ءتيىمدى مودەلدى تاڭداپ وتىر دەپ ايتا الامىز»، - دەدى باقىت نۇرۇحانوۆ.