ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ ۇيىمداستىرۋىمەن مەملەكەتتىك ساياسات پەن قوعامنىڭ وزەكتى تاقىرىپتارىن تالقىلاۋعا ارنالعان پودكاست ىسكە قوسىلدى. باعدارلامانىڭ ءبىرىنشى قوناعى رەتىندە ىشكى ىستەر ءمينيسترى ەرجان سادەنوۆ شاقىرىلدى. باستى تاقىرىپتاردىڭ ءبىرى ەل دامۋىنىڭ نەگىزگى قاعيداتى «زاڭ مەن ءتارتىپ» بولدى.
«بۇل قاعيدات – تەك پوليسيانىڭ عانا جۇمىسى ەمەس. بۇكىل قوعام بولىپ جۇمىس ىستەۋىمىز كەرەك. مىسالى، ءار ازامات كوشەدە نەمەسە كوپ قاباتتى ۇيلەردە تىنىشتىق بولعانىن قالايدى. ءقازىر ءار تۇرعىن ءۇيدىڭ چاتتارىندا ۋچاسكەلىك پوليسەيلەر، باسقا دا جاۋاپتى ازاماتتار بار. ارينە، بۇل پوزيسياسى دۇرىس ادامدار. بۇل مۇلدەم توزبەۋشىلىك ءپرينسيپى»، – دەدى ەرجان سادەنوۆ.
ونىڭ ايتۋىنشا، بۇگىندە ادامداردىڭ مىنەز-قۇلقى وزگەرىپ، جاۋاپكەرشىلىك ارتقان. بۇعان كوبىنەسە قوعامنىڭ ءوزى سەپ بولدى.
«زاڭ مەن تارتىپكە كەلسەك، بىرىنشىدەن ونى وتباسىنان باستاۋ كەرەك دەپ ويلايمىن. ەگەر بالالار ۇلكەندەردىڭ تەمەكى قالدىعىن تاستاعانىن كورەتىن بولسا، ول بالا وسى دۇرىس ەكەن دەپ ويلايدى. ەگەر كوشەدە كەتىپ بارا جاتىپ، اكەسى نەمەسە ۇلكەندەرى جولدى باعدارشامنىڭ قىزىل شامىنا ءوتىپ كەتسە، ونى دا بالا ەسىندە ساقتاپ قالادى. سول سەبەپتى اتا-انالار، ۇيدەگى ۇلكەندەر مىناۋ جامان، مىناۋ جاقسى دەپ ايتىپ وتىرۋى كەرەك»، – دەيدى ءىىم باسشىسى.
سونىمەن قاتار ەرجان سادەنوۆ مەكتەپتىڭ بالاعا تاربيە بەرۋدەگى ءرولىن اتاپ ءوتىپ، مۇعالىمدەر ءوز ءپانىن وقىتىپ قانا قويماي، پاتريوتيزمگە دە تاربيەلەۋى كەرەك ەكەنىن اتاپ ءوتتى.
«ەڭ باستىسى وسى قاعيداتتاردى ومىرىمىزگە ەنگىزۋ، ونى كۇندەلىكتى ۇستانۋ. ول ءومىرىمىزدىڭ نورماسىنا اينالۋى كەرەك»، - دەيدى ەرجان سادەنوۆ.
ايتا كەتەيىك، ءىىم مالىمەتتەرى بويىنشا، سوڭعى 5 جىلدا حالىق سانى 16 ملن-نان 20 ملن ادامعا جەتسە دە، بيىل قىلمىس دەڭگەيى ايتارلىقتاي تومەندەگەن.