الماتىدا «زاڭ مەن ءتارتىپ» اپتالىعى باستالدى. 24–28 ماۋسىم ارالىعىندا قالانىڭ بارلىق اۋدانىندا قۇقىقتىق مادەنيەتتى ارتتىرۋ، زاڭ بۇزۋشىلىقتىڭ الدىن الۋ جانە ازاماتتار مەن مەملەكەتتىك ورگاندار اراسىنداعى بايلانىستى نىعايتۋعا باعىتتالعان ءبىرقاتار ءىس-شارا وتۋدە. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا ايتىلدى، دەپ حابارلايدى aqshamnews.kz
الماتى قالاسى پروكۋراتۋراسىنىڭ رەسمي وكىلى رايىمبەك شارىپبايەۆتىڭ ايتۋىنشا، اكسيانىڭ نەگىزگى ماقساتى – زاڭنىڭ ۇستەمدىگىن نىعايتىپ، بيلىك ينستيتۋتتارىنا دەگەن قوعامنىڭ سەنىمىن ارتتىرۋ.
«زاڭ – تەك ەرەجەلەر جيناعى ەمەس. ول – ءتارتىپتىڭ نەگىزى، قاۋىپسىزدىك پەن ادىلدىكتىڭ كەپىلى. ەگەر زاڭ بۇزۋشىلىقپەن جەدەل كۇرەسسەك، قوعامدا «زاڭمەن ساناسۋ كەرەك»، «زاڭمەن ساناسقان دۇرىس» دەگەن تۇسىنىك بىرتىندەپ قالىپتاسا باستايدى»، – دەدى شارىپبايەۆ.
اپتا بويى قالا بويىنشا جىلجىمالى قۇقىقتىق توپتار جۇمىس ىستەيدى. ولاردىڭ قۇرامىنا پروكۋراتۋرا، پوليسيا، سىبايلاس جەمقورلىققا قارسى قىزمەت، ەكونوميكالىق تەرگەۋ دەپارتامەنتى مەن اكىمدىك وكىلدەرى كىرگەن. ازاماتتار بۇل توپتاردان تەگىن قۇقىقتىق كەڭەس الىپ، ءوتىنىش بەرىپ، ءوز قۇقىقتارىن قالاي قورعاۋعا بولاتىنىن بىلە الادى.
جىلجىمالى توپتىڭ جۇمىس كەستەسى:
• 24 ماۋسىم – المالى جانە بوستاندىق اۋداندارى؛
• 25 ماۋسىم – جەتىسۋ جانە مەدەۋ اۋداندارى؛
• 26 ماۋسىم – اۋەزوۆ جانە تۇركسىب اۋداندارى؛
• 27 ماۋسىم – ناۋرىزباي جانە الاتاۋ اۋداندارى.
سونىمەن قاتار، قالا پروكۋراتۋراسى ىسكە اسىرىپ جاتقان «قۇقىقتىق ءدارىحانا» جوباسى دا جۇمىس ىستەيدى. بۇل جوبا اياسىندا اپتانىڭ سارسەنبى، بەيسەنبى جانە جۇما كۇندەرى ساعات 17:00–20:00 ارالىعىندا Dostyk Plaza، MEGA Alma-Ata جانە Grand Park ساۋدا ورتالىقتارىندا ازاماتتارعا تەگىن كەڭەس بەرىلەدى.
كەڭەس العىسى كەلەتىن نەمەسە زاڭ بۇزۋشىلىق فاكتىلەرى تۋرالى حابارلاعىسى كەلەتىندەر ءۇشىن «سەنىم تەلەفونى» دا ىسكە قوسىلعان.
پروكۋراتۋرا جاستارمەن جۇمىسقا دا ەرەكشە ءمان بەرىپ وتىر. وسى باعىتتا «Zhastarmen» Telegram-ارناسى ارقىلى ارنايى پلاتفورما قۇرىلىپ، جاستارعا قۇقىقتىق كومەك كورسەتىلەدى، ەسىرتكىگە قارسى كامپانيالارعا قاتىسۋعا مۇمكىندىك بەرىلەدى.
«ءقازىردىڭ وزىندە بۇل ارنادا 4000-نان استام ادام تىركەلگەن. ولار – جاۋاپتى، بەلسەندى جاستاردىڭ بىرلەستىگىنە اينالىپ ۇلگەردى»، – دەدى رايىمبەك شارىپبايەۆ.
جوبا اياسىندا ونداعان رەيد جۇرگىزىلىپ، تىيىم سالىنعان زاتتاردى تاراتقان جۇزدەگەن Telegram-ارنالار جابىلعان، 6000-نان استام زاڭسىز گراففيتي وشىرىلگەن. ال 26 ماۋسىم كۇنى ماحاتما گاندي اتىنداعى ساياباقتا جاستار ەسىرتكىگە قارسى فلەشموبقا قاتىسا الادى.
الماتى پوليسيا دەپارتامەنتىنىڭ رەسمي وكىلى سالتانات ازىربەك جاستاردىڭ اراسىندا ءتارتىپ ساقتاۋدى قامتاماسىز ەتۋدىڭ بارىسى تۋرالى باياندادى. ونىڭ ايتۋىنشا، پوليسيا جاسوسپىرىمدەردىڭ اراسىنداعى زاڭ بۇزۋشىلىققا، ەسىرتكىمەن كۇرەس پەن كيبەرقىلمىسقا كوپ كوڭىل ءبولىپ وتىر.
«ءبىز قىلمىستى دەر كەزىندە انىقتاپ قانا قويماي، ەسىرتكى قولدانىپ، ەسىرتكى تاراتۋمەن اينالىساتىن جاسوسپىرىمدەرمەن جۇمىس ىستەۋگە دە ءمان بەرىپ وتىرمىز. ءبىزدىڭ مىندەت – وسىلاردىڭ ۋاقىتىلى الدىن الىپ، ەسكەرتىپ، ولاردى قورعاۋ. ءبىز – وسكەلەڭ ۇرپاقتى تاربيەلەۋدە ۇلكەن ءرول اتقاراتىن مەكتەپتەرگە، كوللەدجدەرگە بارىپ، ولارمەن جەكە-جەكە اڭگىمەلەسۋگە دە دايارمىز»، - دەيدى سالتانات ازىربەك.
«زاڭ مەن ءتارتىپ» اپتالىعى شەڭبەرىندە الماتى قالاسىنىڭ ەكونوميكالىق تەرگەۋ دەپارتامەنتى (ەتد) دە ءوز باعدارلاماسىن ۇسىندى. ەتد وكىلى جاقسىلىق مىرزاحان الاياقتىقتىڭ الدىن الىپ، قۇقىقتىق ساۋاتتىلىقتى ارتتىرۋ بويىنشا جۇرگىزىلىپ جاتقان جۇمىستار تۋرالى باياندادى.
دەپارتامەنتتىڭ باستامالارىنىڭ ءبىرى – «اشىق ەسىك كۇندەرىن» ۇيىمداستىرىپ، مەكتەپ وقۋشىلارىنا قىزمەتتىك يتتەر مەن كينولوگتاردىڭ جۇمىسىن كورسەتۋگە ارنالعان ەكسكۋرسيالار وتكىزۋ.
سونىمەن قاتار، «XXI عاسىردىڭ قارجى تريگگەرى» اتتى فورۋم وتكىزۋ جوسپارلانعان. بۇل جيىنعا قارجى سەكتورىنىڭ ماماندارى، ادۆوكاتتار جانە قارجىلىق ساۋاتتىلىق بويىنشا ساراپشىلار قاتىسىپ، قارجى سالاسىنداعى قاۋىپتەر مەن ولاردان قورعانۋ جولدارى جونىندە كەڭەس بەرەدى.
«بۇل ءىس-شارالاردىڭ نەگىزگى ماقساتى – تۇرعىنداردىڭ قارجىلىق ساۋاتتىلىعىن ارتتىرىپ، قۇقىقتىق مادەنيەتىن كوتەرۋ. ءبىز ەكونوميكا سالاسىنداعى زاڭسىزدىقتاردىڭ الدىن الىپ، ازاماتتاردىڭ قۇقىقتارىن قورعاۋدى جالعاستىرا بەرەمىز»، – دەدى جاقسىلىق مىرزاحان.
بۇعان دەيىن دە دەپارتامەنت جاستارعا ارنالعان ءبىرقاتار جوبالاردى جۇزەگە اسىرعان. ماسەلەن، ستۋدەنتتەرمەن جۇمىس ىستەپ، قارجىلىق ساۋاتتىلىق جونىندە رەسپۋبليكالىق وليمپيادا ۇيىمداستىرعان. بۇل شارادا جاستار قارجىسىن قورعاۋدى، الاياقتىقتان ساقتانۋدى جانە زاڭدىق ءبىلىمىن ارتتىرۋدى ۇيرەندى.
«زاڭ مەن ءتارتىپ» اپتالىعى – تۇراقتى ءارى ءقاۋىپسىز قارجىلىق ورتا قالىپتاستىرىپ، ازاماتتاردىڭ قۇقىقتىق جاۋاپكەرشىلىگىن ارتتىرۋعا باعىتتالعان كەڭ اۋقىمدى باعدارلامانىڭ ءبىر بولىگى عانا. ۇيىمداستىرۋشىلار قالا تۇرعىندارىن بەلسەندى قاتىسۋعا، زاڭ مەن ءتارتىپتى نىعايتۋ جولىندا بىرلەسە ارەكەت ەتۋگە شاقىرادى.