«زاڭ جانە ءتارتىپ»: الماتىلىق ەرىكتىلەر سىبايلاس جەمقورلىقتىڭ الدىن الۋعا اتسالىسادى

الماتىدا «جەمقورلىققا قارسى ەرىكتىلەر» جوباسى اياسىندا 2،5 ملرد تەڭگەدەي بيۋدجەت قاراجاتى ۇنەمدەلدى. قوعامدىق باقىلاۋ مەن سىبايلاس جەمقورلىقتىڭ الدىن الۋ جۇمىسىنا 300-دەن استام ادام تارتىلدى. وڭىرلىك كوممۋنيكاسيالار قىزمەتىندە وتكەن بريفينگتە «ادىلەت جاستار وداعى» جاستار انتيكوررۋپسيالىق قوزعالىسىنىڭ جەتەكشىسى ەربولات تۇرلان وسىلاي دەدى.

جوبا 2025 جىلى الماتى قالاسىنىڭ جاستار ساياساتى باسقارماسىنىڭ قولداۋىمەن جۇزەگە اسىرىلدى. ونىڭ نەگىزگى ماقساتى – جەمقورلىققا قارسى مادەنيەتتى قالىپتاستىرۋ، جاستاردىڭ قۇقىقتىق جانە قارجىلىق ساۋاتتىلىعىن ارتتىرىپ، ازاماتتىق بەلسەندىلىكتى دامىتۋ.
«ءبىزدىڭ مىندەتىمىز – جاستاردى ءاقپاراتتىق-تۇسىندىرۋ جۇمىسىنا عانا ەمەس، قوعامدىق باقىلاۋدىڭ تەتىكتەرىنە دە تارتۋ بولدى»، – دەدى ەربولات تۇرلان.

جىل بويى جوباعا قالانىڭ بارلىق اۋدانىن قامتىعان 300-دەن استام ەرىكتى قاتىستى. الماتى تۇرعىندارى ءۇشىن ەرىكتىلەردىڭ، كاسىبي زاڭگەرلەر مەن قۇقىق قورعاۋ ورگاندارى وكىلدەرى قاتىسقان 20-دان استام كوشپەلى كەڭەس ءوتتى.

قوعامدىق باقىلاۋعا ەرەكشە نازار اۋدارىلدى. ەرىكتىلەر جول جوندەۋ جۇمىسىنىڭ ساپاسىن، بالالار مەن سپورت الاڭدارىنىڭ جاعدايىن، ساياباقتار مەن قوعامدىق كەڭىستىكتەردىڭ تازالىعىن، سونداي-اق مەملەكەتتىك ساتىپ الۋدىڭ جەكەلەگەن راسىمدەرى مەن كولىك ينفراقۇرىلىمى نىساندارىن تەكسەردى. ون باقىلاۋدىڭ قورىتىندىسى بويىنشا انىقتالعان فاكتىلەرمەن ماتەريالدار الماتى قالاسى بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتىنە جولداندى.

سونىمەن قاتار قۇقىق قورعاۋ ورگاندارىمەن بىرلەسىپ الماتى–1 – وتار تەمىرجول باعىتى بويىنشا باقىلاۋ جۇرگىزىلدى. مەكتەپتەر مەن كوللەدجدەردە كەزدەسۋلەر ۇيىمداستىرىلىپ، جاستارعا ادالدىق، جاۋاپكەرشىلىك قاعيداتتارى جانە «زاڭ جانە ءتارتىپ» يدەولوگەماسى ءتۇسىندىرىلدى.

سپيكەردىڭ ايتۋىنشا، قوعامدىق باقىلاۋ الەۋمەتتىك، ەكونوميكالىق تيىمدىلىگىن دالەلدەدى. قول جەتكەن ناتيجەنى ەسكەرە وتىرىپ، باستاما «ادىلەت جاستار وداعى» جاستار قوزعالىسىنا ترانسفورماسيالانىپ، جۇمىسىن جۇيەلى ءارى ۇزاق مەرزىمدى نەگىزدە جالعاستىرىپ كەلەدى.
بۇگىندە قوزعالىس جەمقورلىققا قارسىمادەنيەتتى قالىپتاستىرۋ، سيفرلىق جانە قارجىلىق ساۋاتتىلىقتى ارتتىرۋ، سونداي-اق كيبەرۆولونتەرلىك باعىتتارىن دامىتىپ وتىر. بۇل باعىتتا 3 مىڭنان استام ادام جۇمىلدىرىلعان. ولاردىڭ قاتىسۋىمەن زاڭسىز كونتەنتى بار 737 ينتەرنەت-رەسۋرس انىقتالىپ، بۇعاتتالدى.

قازاقستاندا 2026 جىل سيفرلاندىرۋ جانە جاساندى ينتەللەكتىنى دامىتۋ جىلى بولىپ جاريالانۋىنا بايلانىستى، قوزعالىس الداعى ۋاقىتتا كيبەرالاياقتىقتىڭ الدىن الۋ جۇمىستارىن كۇشەيتۋدى جوسپارلاپ وتىر. كەزدەسۋلەر تەك وقۋ ورىندارىندا عانا ەمەس، سونداي-اق ەڭبەك ۇجىمدارىندا جانە قالا تۇرعىندارى اراسىندا قارجىلىق مونيتورينگ اگەنتتىگىمەن بىرلەسىپ وتكىزىلەتىن بولادى.