الماتىدا ەرىكتىلەردى سيفرلىق ەسەپكە الۋ جاعى قولعا الىنادى

2026 جىلى الماتى جاستاردى ەرىكتىلىك قىزمەتكە تارتۋدىڭ وسى زامانعى سيفرلىق تاسىلدەرىنە دە جۇگىنە باستايدى. ياعني، گەيميفيكاسيا ەلەمەنتتەرى قولدانىسقا ەنىپ، ەرىكتىلەر سيفرلىق ەسەپكە الىنادى. وڭىرلىك كوممۋنيكاسيالار قىزمەتىندە جاستار ساياساتى باسقارماسىنىڭ باسشىسى ازيز كاجدەنبەك وسىلاي دەدى. 

سپيكەردىڭ ايتۋىنشا، ەرىكتىلەر ينفراقۇرىلىمىن دامىتۋ مەن زاماندىق سيفرلىق شەشىمدەردى ەنگىزۋگە ەرەكشە كوڭىل بولىنگەلى وتىر. قازىرگى تاڭدا الماتى ەرىكتىلەر فرونت-كەڭسەسى 58 مىڭنان استام ەرىكتىنىڭ باسىن قوسىپ وتىر، 2025 جىلدىڭ وزىندە 2 مىڭنان استام قالالىق ءىس-شاراعا قولداۋ كورسەتكەن. بۇل ەرىكتىلەر قوزعالىسىنىڭ اۋقىمى ۇلكەن ەكەنىنە دالەل.

«ءبىزدىڭ باستى مىندەتىمىز – ەرىكتىلىكتى ءبىر رەتتىك اكسيا قىلماي، جاستاردى دامىتاتىن، ولاردى قالا ومىرىنە كىرىكتىرەتىن باستاماعا اينالدىرۋ»، – دەيدى.

اتاپ ايتقاندا، قالادا ۆولونتەرلىكتىڭ سيفرلىق مودەلى ەنگىزىلەدى. وعان قاتىساتىن ءار ادامنىڭ مارتەبەسى، جەكە ستاتيستيكاسى، ميسسيالارى مەن جەتىستىكتەرى كورسەتىلەتىن ەرىكتىلەردىڭ سيفرلىق پاسپورتى قالىپتاسادى. سونىمەن قاتار Volu-Coins اتتى ىنتالاندىراتىن ۆاليۋتا ەنگىزۋ دە جوسپارلانىپ وتىر. بۇل ۆاليۋتانى جابىق ءىس-شارالارعا قاتىسىپ، برەند ونىمدەر الىپ، قوعامعا بەلىلى ادامدارمەن كەزدەسكەندە پايدالانۋعا بولادى.

ۇزدىك ەرىكتىلەر قالالىق رەيتينگتەرگە ەنگىزىلىپ، ستراتەگيالىق جوبالارعا قاتىسادى. ارناۋلى ۆيزۋالدى سيفرلىق كارتا ەرىكتىلەردىڭ جۇمىسى مەن باستامالارعا قاتىسۋدى كورنەكى تۇردە باقىلاۋعا مۇمكىندىك بەرەدى.

2026 جىلى الماتىدا «Almaty Volunteers 2026» لەندينگىن ىسكە قوسىپ، جاستار الاڭدارىندا قالدىقتاردى سۇرىپتاۋ پۋنكتتەرىن اشۋ، ەرىكتىلەر اكادەمياسىنىڭ جۇمىسى، جازعى كوشباسشىلىق لاگەر وتكىزۋ مەن Volunteer Skills Map سيفرلىق كارتاسىن ەنگىزۋ دە مەجەلەنگەن. ەرىكتىلەر ورتالىعىنىڭ ءبىرىڭعاي جۇمىس ستاندارتىن ازىرلەپ، ۆەريفيكاسيا تەتىكتەرىن ەنگىزىپ، ەرىكتى مارتەبەسىن دامىتۋ بويىنشا ۇسىنىس تا ازىرلەنىپ جاتىر.