حالىقارالىق ەرىكتىلەر جىلى الماتىدا 200-دەن استام ءىس-شارا وتەدى

بىرىككەن ۇلتتار ۇيىمى 2026 جىلدى حالىقارالىق ەرىكتىلەر جىلى دەپ جاريالاعاندىقتان، الماتىدا ەرىكتىلەر مەن جاستار قوزعالىسىن دامىتۋدىڭ نەگىزگى باعىتتارىن تانىستىردى. وڭىرلىك كوممۋنيكاسيالار قىزمەتىندە جاستار ساياساتى باسقارماسىنىڭ باسشىسى ازيز كاجدەنبەك وسى جايلى ايتتى. 

ونىڭ ايتۋىنشا، حالىقارالىق ەرىكتىلەر جىلىن وتكىزۋ تۋرالى شەشىم قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ باستاماسىمەن جۇزەگە اسىپ كەلە جاتقان كوپجىلدىق جۇيەلى جۇمىستىڭ ناتيجەسى بولىپ وتىر.

«2026 جىلدىڭ حالىقارالىق ەرىكتىلەر جىلى رەتىندە تانىلۋى – سيمۆولدىق قادام ەمەس، بۇل پرەزيدەنت قاسىم-جومارت توقايەۆتىڭ باستاماسىمەن جۇزەگە اسقان دايەكتى ءارى جۇيەلى جۇمىستىڭ ناتيجەسى. بۇل ەشنارسەگە بەيجاي قارامايتىن بەلسەندى ازاماتتاردىڭ ورتاق جەتىستىگى»، – دەدى ازيز كاجدەنبەك.
 
الماتى – قازاقستانداعى جاستارى ەڭ كوپ قالا بولعاندىقتان، ەلدەگى ەرىكتىلەر قوزعالىسىن دامىتۋدا ەرەكشە ورىن الادى. قالدا ءقازىر 712 مىڭنان استام جاس تۇرادى، ولار 35 جوعارى وقۋ ورنى جۇمىس ىستەيدى. وسى جاقىندا الماتى قازاقستان مەن تۇركى الەمىندەگى جاستاردىڭ استاناسى مارتەبەسىنە يە بولدى.

حالىقارالىق ەرىكتىلەر جىلى اياسىندا الماتىدا سەگىز نەگىزگى باعىت بويىنشا 200-دەن استام ءىس-شارا وتكىزۋ جوسپارلانعان.

سونداي-اق جىل بويى الماتىدا «100 يگى كەزدەسۋ» جوباسى، Birgemiz Inclusion ينكليۋزيۆتى باعدارلاماسى، «ۇرپاقتار ديالوگى – الماتى» تالىمگەرلىك باستاماسى، جانۋارلاردى قورعاۋ، مادەنيەت، قالالىق حاكاتوندار، مۋرالدار مەن پودكاستتار سالاسىنداعى جوبالار جۇزەگە اساتىنى دا ايتىلدى.

«بۇلاردىڭ بارلىعى ەرىكتىلىكتى كەمەل ادام بولۋدىڭ، جاستاردى قالانىڭ دامۋىنا قاتىستىرۋدىڭ ناقتى قۇرالىنا اينالدىراتىن تۇراقتى جۇيە قالىپتاستىرۋعا باعىتتالعان»، – دەپ تۇيىندەدى ءسوزىن ازيز كاجدەنبەك.