قازاقستاندىقتار ءجيى دەمالاتىن كورشىلەس قىرعىز ەلى ىستىقكول كولى جاعاسىندا بيىلدان باستاپ پوليەتيلەن مەن پلاستيك قولدانۋعا ايىپپۇلدار ەنگىزىلگەنىن ەسكەرۋ قاجەت. بۇل جاڭالىقتى بىلگەن تۋريستەر ءۇشىن جاعىمسىز جاڭالىق بولۋى مۇمكىن. سەبەبى ىستىقكول جاعالاۋى كوبىنە پلاستيك پاكەتتەر مەن ىدىستارعا تولىپ كەتەتىن. اسىرەسە، دەمالۋشىلار جاعاجايدا جۇگەرى، قۇلپىناي نەمەسە شيەنى ساتىپ العاندا، كوبىنە پلاستيك ىدىستارمەن بەرىلەدى. ال ولار كەيىن قوقىسقا تاستالادى. بۇل قورشاعان ورتاعا ايتارلىقتاي زيان كەلتىرىپ، جاعالاۋداعى تازالىقتى بۇزادى، دەپ حابارلايدى aqshamnews.kz
ەندى، ىستىقكولدىڭ كۋرورتتىق ايماعىندا قازىردەن باستاپ پلاستيك جانە پوليەتيلەن ونىمدەرىن قولدانۋ ءۇشىن ايىپپۇل سالىناتىن بولادى. قىرعىزستان ۇكىمەتى كۋرورتتىق ايماقتا پلاستيك پەن پوليەتيلەننىڭ قولدانىلۋىنا قارسى جاڭا شارالار ەنگىزىپ، ايىپپۇل سومالارىن دا بەكىتتى. دەمەك، ەندى پلاستيك پاكەتتەر مەن ىدىستاردى قولدانۋ تۋريستەرگە نەمەسە كاسىپكەرلەرگە ايتارلىقتاي قارجىلىق شىعىندارعا اكەلۋى مۇمكىن.
بۇل شارا ەكولوگيالىق جاعدايدى جاقسارتۋ جانە ىستىقكولدىڭ تابيعي بايلىعىن قورعاۋ ماقساتىندا قابىلدانعان. سوندىقتان، قازاقستاننان بارعان تۋريستەرگە پلاستيكتەن اۋلاق بولۋ جانە ەكولوگيالىق تازا ونىمدەر قولدانۋ ۇسىنىلادى.