بۇگىن ىستانبۇلدا تۇركى مەملەكەتتەرى ۇيىمىنا مۇشە ەلدەردىڭ اقپارات جانە باق-قا جاۋاپتى مينيسترلەرى مەن جوعارى لاۋازىمدى تۇلعالارىنىڭ ءتورتىنشى وتىرىسى وتەدى. بۇل تۋرالى Almaty-akshamy.kz حابارلايدى Inform.kz-كە سىلتەمە جاساپ.
شارانى تۇركيا پرەزيدەنتى اكىمشىلىگىنىڭ بايلانىس ءبولىمى ۇيىمداستىرىپ وتىر. ماقسات – تۇركى مەملەكەتتەرى اراسىندا ب ا ق جانە كوممۋنيكاسيا سالاسىنداعى ىنتىماقتاستىقتى دامىتۋ. كۇن تارتىبىندە اتالعان سالالارداعى بىرلەسكەن زەرتتەۋلەر مەن جوبالار قارالماق. تۇركيا پرەزيدەنتى رەجەپ تايىپ ەردوعان جيىن قاتىسۋشىلارىنا بەينەۇندەۋ جولدايدى دەپ جوسپارلانعان. كەزدەسۋگە تۇركى مەملەكەتتەرى ۇيىمىنىڭ باس حاتشىسى باعداد امىرەيەۆ، تۇركيا پرەزيدەنتى اكىمشىلىگى بايلانىس كەڭسەسىنىڭ مەڭگەرۋشىسى فاحرەتتين التۋن، ازەربايجان پرەزيدەنتىنىڭ كومەكشىسى حيكمەت گادجييەۆ قاتىسادى. سونىمەن قاتار، وتىرىسقا ق ر اقپارات جانە قوعامدىق دامۋ ءمينيسترى اسقار وماروۆ، ۆەنگريا سىرتقى ىستەر جانە ساۋدا مينيسترلىگىنىڭ قاۋىپسىزدىك ساياساتى جونىندەگى مەملەكەتتىك حاتشىسى پەتەر شتاراي، وزبەكستان پرەزيدەنتى اكىمشىلىگى جانىنداعى اقپارات جانە بۇقارالىق كوممۋنيكاسيالار اگەنتتىگىنىڭ ديرەكتورى اسادجون حودجايەۆ، قىرعىزستان مادەنيەت، اقپارات، سپورت جانە جاستار ساياساتى مينيسترلىگى جانىنداعى اقپارات جانە بۇقارالىق كوممۋنيكاسيالار دەپارتامەنتىنىڭ ديرەكتورى سالقىن سارنوگويەۆا، تۇرىكمەنستاننىڭ انكاراداعى ەلشىسى يشانكۋلي امانلىيەۆ قاتىسادى.
ءىس-شاراعا رەسمي دەلەگاسيالاردان بولەك، تۇركى الەمىنىڭ ب ا ق جانە كوممۋنيكاسيا ينستيتۋتتارىنىڭ باسشىلارى، ساراپشىلار، ونەر قايراتكەرلەرى، عالىمدار مەن كوممۋنيكاسيا فاكۋلتەتتەرىنىڭ ستۋدەنتتەرى دە قاتىسادى. قاتىسۋشىلار سيفرلىق تەحنولوگيامەن جابدىقتالعان ستەندتەر مەن فويەدە تۇركى مەملەكەتتەرى ۇيىمىنا قاتىسۋشى جانە باقىلاۋشى ەلدەردىڭ بۇقارالىق اقپارات قۇرالدارى مەن بايلانىس مەكەمەلەرىنىڭ قىزمەتى تۋرالى اقپارات الا الادى.
ەسكە سالساق، ورتالىق ازيا ەلدەرىندە قازاقستاندىق جوو فيليالدارى اشىلۋى مۇمكىن.