نەگىزگى پروبلەمالار – لوگيستيكاداعى ىركىلىستەر، جالپى ىسكەرلىك بەلسەندىلىكتىڭ تومەندەۋى
ەلوردادا قازاقستان ەكسپورتتاۋشىلارىنىڭ ءبىرىنشى فورۋمى ءوتتى، وعان 70-كە جۋىق ەكسپورتتاۋشى كومپانيا قاتىستى، دەپ حابارلايدى Almaty-akshamy.kz Inform.kz-كە سىلتەمە جاساپ.
ق ر ساۋدا جانە ينتەرگراسيالار ءمينيسترى باقىت سۇلتانوۆتىڭ ايتۋىنشا، قازاقستانداعى بەلسەندى ەكسپورتتاۋشىلار سانى 540-تان استى، بۇل كورسەتكىش جىلدان-جىلعا ارتىپ كەلەدى.
«سوڭعى ءۇش جىل بارلىق حالىقارالىق ساۋدا ءۇشىن كۇردەلى بولدى. قازىرگى ۋاقىتتا COVID-19 سالدارى مەن الەمدەگى گەوساياسي جاعداي قازاقستاننىڭ دا سىرتقى ساۋداسىنا ىقپال ەتىپ وتىر. نەگىزگى پروبلەمالار – لوگيستيكاداعى ىركىلىستەر، جالپى ىسكەرلىك بەلسەندىلىكتىڭ تومەندەۋى بولىپ قالا بەرەدى. رەسەي-ۋكراينا داعدارىسى پاندەميالىق شەكتەۋلەردەن كەيىن قالپىنا كەلىپ ۇلگەرمەگەن جەتكىزۋ تىزبەگىنىڭ ۇزىلۋىنە اسەر ەتتى. ءبىز بيزنەسپەن بەلسەندى جۇمىس ىستەدىك، ەۋروپالىق وداق باعىتىنداعى جۇكتەردىڭ ءوتۋىن قامتاماسىز ەتتىك»، - دەدى باقىت سۇلتانوۆ فورۋم بارىسىندا.
ءمينيستردىڭ ايتۋىنشا، تاعى ءبىر وزەكتى ماسەلە – وتكىزۋ نارىقتارىن قايتا باعدارلاۋ.
«بۇگىن فورۋمعا قاتىساتىن كوپتەگەن كاسىپورىنداردىڭ جاڭا نارىققا شىعۋ ءۇشىن قوسىمشا مۇمكىندىك ىزدەپ جاتقانىن بىلەمىن. مەملەكەتتىك قۇرىلىمدار دا جاڭا باعىتتار بويىنشا ەكسپورت مۇمكىندىكتەرىن پىسىقتاۋعا كىرىستى» ، - دەدى ساۋدا ءمينيسترى.
فورۋم اياسىندا قازاقستاندىق ەكسپورتتاۋشىلار شەتەلدىك نارىقتارعا جىبەرىلەتىن تاۋارلارىن كورمەگە شىعاردى. ولاردىڭ اراسىندا پوليپروپيلەن سۋ سۇزگىلەرى، جانۋارلارعا ارنالعان ديەتالىق قوسپالار، بيو-يوگۋرتتار مەن جەمىس-جاڭعاق شوكولادتارى بار. بارلىق ەكسپورتتاۋشىلار – ەكسپورتتى مەملەكەتتىك قولداۋ باعدارلامالارىنىڭ قاتىسۋشىلارى.