تۇركيادا «Qandastar» كوپتومدىق تۋىندىسى جارىق كوردى
جۋرناليست گۇلناز كارىمجاننىڭ ەڭبەگى تاعدىردىڭ ايداۋىمەن الەمنىڭ ءار قيىرىنا شاشىراعان قازاق حالقىنىڭ ءجۇرىپ وتكەن جولى مەن بۇگىنگى تىنىس-تىرشىلىگى تۋرالى باياندايدى، دەپ حابارلايدى Almaty-akshamy.kz
اتامەكەندەگى ايتۋلى كۇندەردى قالت جىبەرمەيتىن شەتەلدەگى قانداستارىمىز تاۋەلسىزدىكتىڭ 30 جىلدىعىن سارالاپ، اق تىلەكتەرىمەن ءبولىستى. جيناقتىڭ العاشقى ءبولىمى تۇركيادا تۇراتىن قانداستارىمىزعا ارنالعان.
«بۇل كىتاپتىڭ ءمانى ەرەكشە، مەن ءبىر تاريحشى رەتىندە ايتايىن. ءسوز ايتىلىپ كەتەدى، جازۋ قالادى. «جاقسىنىڭ اتى، عالىمنىڭ حاتى ولمەيدى» دەيدى. «حات» دەگەن ءسوز كىتاپ دەگەنىمىز. بۇل كىتاپ كەلەشەك ۇرپاققا تۇركيا قازاقتارىنىڭ مادەنيەتىن، ومىر-تىرشىلىگىن تانىستىرادى. كىتاپ وقىعان كىسىگە دۇنيەجۇزىندەگى قازاقتىڭ مادەنيەتى ورتاق ەكەنىن، قايعىسى، قۋانىشى، مۇڭى، ماقسات-مۇددەسى ورتاق ەكەنىن ايگىلەپ وتىر. سونىسىمەن دە ەرەكشە قۇنعا يە دەپ ويلايمىن»، - ميمار سينان ۋنيۆەرسيتەتىنىڭ پروفەسسورى، تاريحشى ءابدىۋاقاپ قارا.