ىستامبۇلدا دۇنيەجۇزى قازاقتارى قاۋىمداستىعىنىڭ وكىلدىگى اشىلدى

التايدان كوشكەن قازاقتاردىڭ تۇركياعا قونىس اۋدارعانىنا 70 جىل.

وسىعان وراي ىستامبۇل قالاسىندا دۇنيەجۇزى قازاقتارى قاۋىمداستىعىنىڭ وكىلدىگى اشىلدى، دەپ حابارلايدى Almaty-akshamy.kz.

قوعامدىق ۇيىمنىڭ تۇركياداعى وكىلى بولىپ ديپلومات، ءارى ارداگەر جۋرناليست ەرجان ءۋايىس تاعايىندالدى. حالىقارالىق ۇيىمنىڭ ءوفيسى قازاقتار كوپ شوعىرلانعان زەيتىنبۇرنى اۋدانىندا ورنالاسقان. وكىلدىكتىڭ اشىلۋ سالتاناتىنا قازاقستاننان كەلگەن قوناقتارمەن قاتار، تۇركيادا تۇراتىن قازاقتار، ىستامبۇل ءماسليحاتىنىڭ دەپۋتاتتارى، زەيتىنبۇرنى اۋدانىنىڭ باسشىلارى سياقتى لاۋازىمدى تۇلعالار قاتىستى.

دۇنيەجۇزى قازاقتارىنىڭ تۇركياداعى وكىلدىگى، قانداستاردىڭ ءتۇرلى ماسەلەسىن شەشۋگە ات سالىسىپ قانا قويماي، ەكى ەل اراسىنداعى بايلانىستاردىڭ نىعايۋىنا دا ىقپال ەتپەك.

«قاۋىمداستىقتىڭ نەگىزگى ماقساتى دۇنيەگە تارىداي شاشىلعان قازاقتىڭ باسىن بىركتىرۋ. بىرنەشە مەملەكەتتە بار ۋاكىلدىك. سونىڭ ءبىرى مىنە تۇركيا ەلىندە اشىلىپ جاتىر. بۇل ۇلكەن قۋانىشتى نارسە. ءبىز ءبىر اتانىڭ بالالارىمىز، ءبىر ۇرپاقپىز، ءتىلىمىز دە ءبىر، ءدىنىمىز دە ءبىر، ادەت-عۇرىپ ءسالت-داستۇرىمىز دە ءبىر. سونى ءارى قاراي بىرلىكتە جالعاستىرۋىمىز كەرەك. بۇل بۇگىنگى ۇرپاق ءۇشىن ماڭىزدى»، - دەدى دۇنيەجۇزى قازاقتارى قاۋىمداستىعىنىڭ تۇركياداعى وكىلى ەرجان ءۋايىس.