ۇلتتىق ونەرىمىز تۇركيادا ۇلىقتالدى
«الماتى اقشامى» گازەتى قالامىزدىڭ مادەني ومىرىنەن قالىس ەمەس. تەاتر بولسىن، كورمەلەر دەيسىن بە، بارلىعى قامتىلىپ، جاڭالىقتار جازىلىپ جاتادى. وسىعان دەيىندە 8 شىلدەگە قاراستى نومىرىمىزدە «الاتاۋ» ءداسۇرلى ونەر تەاترىندا بۇرىن سوندى بولماعان تۇساۋكەسەر – جاڭا باعىتتاعى «التىباقان» ان-كەشى جايلى ايتقان بولاتىنبىز. ەندى، مىنە، تەاتر ۇجىمى وسى قويىلىممەن تۇركيادا ۇلتتىق ونەرىمىزدى پاش ەتتى.
جالپى، قازاقستان مەن تۇركيا مەملەكەتتەرى اراسىنداعى مادەني بايلانىستاردىڭ ءبىر تارماعى – تەاتر مەن مۋزىكا ونەرى سالاسىنداعى قارىم-قاتىناستار. باۋىرلاس ەكى ەلدىڭ مادەني سەرىكتەستىگىندە ءداستۇرلى مادەنيەت ۇلگىلەرىن جاڭعىرتۋدىڭ دا ماڭىزى ەرەكشە. بۇل - ەكى ەلدىڭ ءتول مادەنيەتىندە قانداي ەرەكشەلىكتەرى مەن ۇقساستىقتارىنىڭ بار ەكەنىن تانىتاتىن تۇسى.
الماتى قالاسىنىڭ اكىمدىگى، الماتى قالاسىنىڭ اكىمدىگىنە قاراستى الماتى قالاسى مادەنيەت باسقارماسى، قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگى، ىستامبۇل قالاسى اكىمدىگى جانە الماتى قالاسى مادەنيەت باسقارماسىنا قاراستى «الاتاۋ» ءداستۇرلى ونەر تەاترىنىڭ ۇيىمداستىرۋىمەن قازاقستاننىڭ تاۋەلسىزدىگىنىڭ 30 جىلدىعىنا وراي ۇلتتىق ونەرىمىزدى تانىتۋ، ۇلتتىق بىرەگەيلىكتى دارىپتەۋ ماقساتىندا 2021 جىلدىڭ 25 قاراشا كۇنى تۇركيانىڭ ىستامبۇل قالاسىندا دجەمال رەشيت رەي كونسەر سالونۋندا «التىباقان» ويىن-ساۋىق ءان كەشى ءوتتى.
ۇلتىمىزدىڭ ماقتانىش ەتەر اسىل مۇراسى، رۋحاني جادىگەرلەرى ىشىندە ۇمىت بولىپ بارا جاتقان قازاقتىڭ تۇرمىس-سالتىنان سىر شەرتەتىن «التىباقان» ۇلتتىق ويىنى – قازاق جاستارىنىڭ ەرتەدەن كەلە جاتقان كەشكىلىك باس قوسىپ، ءان ايتىپ، دومبىرا تارتىپ، ايتىس جاساپ، بي بيلەپ، ءتۇرلى ويىندار ويناپ، كوڭىل كوتەرىپ، ويىن-ساۋىق قۇراتىن كەشى. وسى ۇلتتىق ويىننىڭ توڭىرەگىندە اۋەلەتكەن ءداستۇرلى ءان مەن كۇمبىرلگەن كۇي، اقىندىق پەن بيلەرىمىز ءبىر بىرىمەن استاسقاننان كەيىن «التىباقان» جاي ويىن عانا ەمەس، سول كەزدەگى قازاقى ونەردىڭ ۇيىتقىسىنا اينالعان، ماڭىزدى مادەني شارامەن تەڭبە-تەن بولعان. كوشپەلى قازاق ونەر بولەك ءبىر سالا ەمەس، ءومىردىڭ وزىندەي بولاتىن. سوندىقتان وسى قويىلىممەن باۋىرلاس ەلدە ونەر كورسەتۋ، ەكى ەل اراسىنداعى ساباقتاستىققا وزىندىك ۇلەسىن قوسقانىنا، وزىندىك ءداستۇرىمزدى ناسيحاتتاۋعا ۇلەس قوسقانى ءسوزسىز.
ءان كەشىنە قازاقستان رەسپۋبليكاسىنىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى ارنايى كەلىپ، قۇتتىقتاۋ ءسوزىن ايتتى. سونداي-اق باۋىرلاس تۇرىك ەلىندە ءبىلىم الىپ جۇرگەن وتانداستارىمىز، تۇركيالىقتار جانە ت.ب. بوي كورسەتتى. ابزال ساپاربەك ۇلى تۇرىك جانە ازەربايجاندىق ونەر ساڭلاقتارى مەن كورەرمەندەر قاتارىندا ونەرپازدارىمىزدىڭ تالانتتارىنا ءتانتى بولىپ، ۇلتتىق ونەرىمىزدىڭ وركەندەي بەرۋىنە دەمەۋ كورسەتكەن الماتى قالاسىنىڭ اكىمى باقىتجان ءابدىر ۇلى ساعىنتايەۆقا، تەاتر ديرەكتورى رينات زايتوۆ پەن قويىلىمنىڭ كوركەمدىك جەتەكشىسى جۇلدىزبەك جۇمانبايعا، ونەرپازادارىمىزعا العىستارىن ايتىپ، جىلى لەبىزدەرىن ءبىلدىردى.
«مەن بارلىق تەاتر ۇجىمىنا، رەجيسسەر مىرزاعا شەكسىز العىس بىلدىرەمىن. ءوزىمىز ءازىربايجاندىقپىز، قازاق ءتىلىن بىلمەسەك تە، انشىلەردىڭ اسەم داۋىسى ارقاسىندا قويىلىم تۇركى مادەنيەتىنىڭ ۇلگىسىن جۇرەككە جىلى جەتكىزە الدى. اسىرەسە، ءازىربايجان حالىق ءانى ورىنداعاندا، قىزىم ەرىكسىز جىلاپ جىبەردى. ءوز اتىمىزدان قازاقستانعا ۇلكەن العىس بىلدىرەمىز، مۇنداي كەشتەر جالعاسا بەرسە ەكەن»، - دەدى كورەرمەن.
قازاقستاننىڭ تۇڭعىش پرەزيدەنتى – ەلباسى ن. ءا. نازاربايەۆ ءوزىنىڭ «ۇلى دالانىڭ جەتى قىرى» اتتى ماقالاسىندا: «اۋىزشا جانە مۋزىكالىق ءداستۇردى جاڭعىرتۋ قازىرگى زامانعى اۋديتورياعا جاقىن ءارى تۇسىنىكتى فورماتتا بولۋى كەرەك»، – دەپ اتاپ كورسەتكەن بولاتىن. رۋحاني قۇندىلىقتاردىڭ تۇپكى ءمانى ۇلتتىق ونەر ەكەنى بەلگىلى. بۇل ادامداردىڭ رۋحاني قاجەتتىلىكتەرىن قاناعاتتاندىرادى. قازاق حالقىنىڭ ۇلتتىق ءداستۇرلى ونەرى – ماڭگىلىك وشپەيتىن ومىرشەڭ قازىنا. كۇللى الەمگە ماقتانىشپەن كورسەتە الاتىن سيمۆولىمىز. ءتول ونەرىمىزدى ورگە سۇيرەپ، بارىنشا ناسيحاتتاۋ – بارشامىزدىڭ پارىزىمىز. پاديشا ءداستۇرلى ءان ونەرىمىز قاناتىن كەڭگە جايىپ، ۇلى دالا رۋحى اسقاقتاي بەرگەي!