اباي مەن قۇرمانعازىنىڭ، جامبىل مەن نۇرعيسا تىلەندييەۆتىڭ دومبىرالارى تۇركيالىقتارعا تانىستىرىلدى.
ىستامبۇل قالاسىندا الماتى مۋزەيلەر بىرلەستىگىنىڭ «دالا داۋىسى» حالىقارالىق كورمەسى ءوتتى. باس كونسۋلدىقتىڭ قولداۋىمەن ۇيىمداستىرىلعان شارا تاۋەلسىزدىك كۇنى مەن قازاقستان-تۇركيا ديپلوماتيالىق قارىم-قاتىناسىنىڭ 30 جىلدىعىنا ورايلاستىرىلعان، دەپ حابارلايدى Almaty-akshamy.kz 24.kz-كە سىلتەمە جاساپ.
كورمەدە قالا تۇرعىندارىنىڭ نازارىنا ىقىلاس اتىنداعى مۋزىكالىق اسپاپتار مۋزەيىنىڭ قورىنداعى قۇندى جادىگەرلەر ۇسىنىلدى. ولاردىڭ قاتارىندا بەلگىلى تۇلعالار قولدانعان اسپاپتاردىڭ دالمە-دال كوشىرمەلەرى دە بار. شاراعا كەلگەن تۇركيالىقتار قازاقتىڭ كونە مۋزىكالىق اسپاپتارىن اسقان قىزىعۋشىلىقپەن تاماشالادى.
«كورمەنىڭ نەگىزگى ماقساتى - ءتۇبى ءبىر تۇركى حالىقتارىنىڭ مۋزىكالىق مادەنيەتىن تانىتۋ، ناسيحاتتاۋ. تۇركيا جۇرتشىلىعى ءبىزدىڭ ىستامبۇل قالاسىندا ۇيىمداستىرىپ وتىرعان كورمەمىزگە وتە قىزىعۋشىلىق تانىتىپ وتىر. ۇلتتىق اسپاپتار بۇل ىقىلاس اتىنداعى مۋزىكالىق اسپاپتار مۋزەيىنىڭ قورىندا ساقتالعان بىرەگەي اسپاپتار»، - دەدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
«بۇگىنگى كورمە تاماشا ءوتتى. ءبىزدىڭ مادەنيەتىمىز ءبىر، تاريحىمىز ءبىر. سوندىقتان ءدال وسىنداي كورمەنىڭ ءبىزدىڭ اۋداندا وتكىزىلىپ وتىرعانىنا وتە قۋانىشتىمىن. ءبىر بايقاعانىم - ۇلتتىق مۋزىكا اسپاپتارىمىز ۇقساس ەكەن. بۇل دا - باۋىرلاستىقتىڭ ءبىر بەلگىسى»، - دەدى ىستامبۇل قالاسى باقىركوي اۋداندىق تەاتر دەپارتامەنتىنىڭ ديرەكتورى اسۋمان ايدوعمۋش.