الماتى قالاسىنداعى الماتى وبلىستىق ورتالىق امبەباپ كىتاپحاناسىندا جازۋشى ىرىسبەك دابەيدىڭ «تۇماندى قاراشا. اي سوناتاسى» اتتى جاڭا كىتابىنىڭ تۇساۋكەسەر كەشى ءوتتى. بۇل تۋرالى Aqshamnews.kz سايتى حابارلايدى.
ادەبي كەشكە بەلگىلى قالامگەرلەر، جاس جازۋشىلار، ب ا ق وكىلدەرى جانە ادەبيەتسۇيەر قاۋىم قاتىستى. جاڭا جيناققا اۆتوردىڭ سوڭعى جىلدارى جازعان اڭگىمەلەرى مەن «تۇماندى قاراشا. اي سوناتاسى» حيكاياتى ەنگەن. بۇل شىعارمالار بۇعان دەيىن وقىرمانداردىڭ جوعارى باعاسىنا يە بولىپ، رەسپۋبليكالىق جانە حالىقارالىق ادەبي بايگەلەردە جۇلدەلى ورىندارعا يە بولعان.
كەش بارىسىندا ق ر جازۋشىلار وداعىنىڭ مۇشەسى، "اقجەلكەن" جۋرنالىنىڭ باس رەداكتورى اقىن ەسەي جەڭىس ۇلى، مەملەكەتتىك «دارىن» جاستار سىيلىعىنىڭ لاۋرەاتى اقىن اقبەرەن ەلگەزەك، "انا ءتىلى" گازەتىنىڭ باس رەداكتورى اقىن ەرلان ءجۇنىس، سونداي-اق الماتى وبلىستىق ورتالىق امبەباپ كىتاپحاناسىنىڭ ديرەكتورى عاليا سلامباي قىزى مەن كىتاپتىڭ رەداكتورى سانجار بەكجان تۋىندىنىڭ تۇساۋىن كەسىپ، جازۋشىنىڭ شىعارماشىلىعىنا جوعارى باعا بەردى.
ايتا كەتەيىك، «تۇماندى قاراشا. اي سوناتاسى» جيناعى «Steppe & World Publishing» باسپاسىنان جارىق كوردى. بۇل باسپا زاماناۋي قازاق ادەبيەتىنىڭ دامۋىنا زور ۇلەس قوسىپ كەلە جاتقان بەلدى باسپالاردىڭ ءبىرى.
ىرىسبەك دابەيدىڭ بۇل جاڭا كىتابى قازىرگى قازاق ادەبيەتىندەگى ماڭىزدى تۋىندىلاردىڭ ءبىرى بولارىنا سەنىم مول.