قازاقستان مەن نورۆەگيا اراسىنداعى ديپلوماتيالىق قارىم-قاتىناسقا – 30 جىل!
بۇگىن، 6 ماۋسىم – قازاقستان-نورۆەگيا ىنتىماقتاستىعىنداعى ايتۋلى كۇن – ەكى ەل اراسىندا ديپلوماتيالىق قاتىناستاردىڭ ورناعانىنا 30 جىل تولىپ وتىر، دەپ حابارلايدى Almaty-akshamy.kz
قازىرگى تاڭدا قازاقستاندا نورۆەگيا كاپيتالىنىڭ قاتىسۋىمەن 17 كاسىپورىن جۇمىس ىستەيدى. ەلىمىزدىڭ ەكونوميكاسىنا كورولدىك تاراپىنان قۇيىلعان ينۆەستيسيالار كولەمى 164 ملن دوللار قۇرايدى.
نورۆەگيا – قازاقستاننىڭ ەۋروپاداعى ماڭىزدى ارىپتەستەرىنىڭ ءبىرى. ەلىمىزدىڭ سىرتقى ىستەر مينيسترلىگى تاراتقان اقپاراتقا سايكەس، تاريحي تۇرعىدان قىسقا مەرزىم ىشىندە مەملەكەتتەرىمىز اراسىنداعى سىندارلى ساياسي ديالوگ سەرپىندى دامىپ، ءوزارا ءتيىمدى ساۋدا-ەكونوميكالىق ىنتىماقتاستىق ءورىسى ايتارلىقتاي كەڭەيدى.
ەلدەرىمىز حالىقارالىق كۇن تارتىبىندەگى كوپتەگەن ماسەلەلەر بويىنشا ۇقساس ۇستانىمدا جانە بۇۇ، ەقىۇ جانە باسقا دا حالىقارالىق قۇرىلىمدار اياسىندا تىعىز ىنتىماقتاستىقتا. ەكى مەملەكەت حالىقارالىق قاۋىپسىزدىكتى قامتاماسىز ەتۋگە دە ەلەۋلى ۇلەسىن قوسۋدا. اتاپ ايتقاندا، كورولدىك قازاقستاندا اتوم ەنەرگياسى حالىقارالىق اگەنتتىگىنىڭ قامقورلىعىمەن تومەن بايىتىلعان ۋران حالىقارالىق بانكىن قۇرۋدى قولداعان مەملەكەتتەر توبىنا قوسىلىپ، وسى حالىقارالىق باستامانىڭ دونورلارىنىڭ بىرىنە اينالعان.
ەكى تاراپ ەكونوميكالىق ىنتىماقتاستىقتى ودان ءارى كەڭەيتۋ ماقساتىندا كەشەندى جۇمىستار اتقارۋدا. 2021 جىلدىڭ قورىتىندىسى بويىنشا 85 ملن. اقش دوللارىن قۇراعان تاۋار اينالىمىن جاقىن كەلەشەكتە ەسەلەۋ جوسپارى تۇر.
تاراپتار اراسىنداعى مادەني-گۋمانيتارلىق بايلانىستاردى دامىتۋعا ۇلكەن ءمان بەرىلگەن. 2002 جىلى يۋنەسكو مەن نورۆەگيا مادەني مۇرا ديرەكتوراتى بىرلەسىپ تاڭبالى پەتروگليفتەرىن مەڭگەرۋ، ساقتاۋ جانە تانىستىرۋ جوباسىن ىسكە اسىرعان بولاتىن. ناتيجەسىندە، 2004 جىلى پەتروگليفتەر يۋنەسكو-نىڭ بۇكىلالەمدىك مۇرالار تىزىمىنە ەنگىزىلدى.
قازاقستان مادەنيەتىن الەمگە پاش ەتۋ جۇمىستارى اياسىندا ەكى ەل اراسىنداعى ىنتىماقتاستىق تاريحىندا العاش رەت ابايدىڭ تاڭداۋلى پوەزياسى مەن «قارا سوزدەرى» نورۆەگ تىلىنە اۋدارىلىپ، شىعارىلدى.
ەكى ەلدىڭ ۇكىمەتتەرى الەۋەتى مول قازاقستان-نورۆەگيا ىنتىماقتاستىعىن ودان ءارى تەرەڭدەتۋ جانە ءوزارا ءتيىمدى ارىپتەستىكتىڭ جاڭا كوكجيەكتەرىن يگەرۋ ماقساتىندا بىرلەسكەن جۇمىس اياسىن كەڭەيتۋدە.