ءتىل كۋرستارى، وقىتۋ باعدارلامالارى، كينوكورسەتىلىمدەر: الماتىلىق ۆولونتەرلەر ءتۇرلى سالا بويىنشا تۇرعىندارعا قالاي كومەكتەسۋدە aqshamnews.kz
الماتىدا 50 مىڭنان استام ازاماتتى بىرىكتىرەتىن ۆولونتەرلەردىڭ 30-دان استام ءىرى ۇيىمى بار. جىل باسىنان بەرى ولار 500-دەن استام ءىس-شارالار مەن اكسيالار وتكىزدى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا جاستار ساياساتىن دامىتۋ مەملەكەتتىك قورى باسشىسىنىڭ مىندەتىن اتقارۋشى، الماتى قالاسى بويىنشا ۆولونتەرلار ءفرونت-وفيسىنىڭ جەتەكشىسى باعدات اناربايەۆا ايتىپ بەردى، دەپ حابارلايدى
«الماتى قالاسىندا از قامتىلعاندارعا قامقورلىق جاساۋ، قورشاعان ورتانى قورعاۋ، مۇقتاج جاندارعا كومەك كورسەتۋ جانە ت.ب. سياقتى قىزمەتتىڭ ءارتۇرلى سالالارىنا ارنالعان ۇيىمدار مەن باستامالاردىڭ كەڭ اۋقىمىن قامتيتىن باي جانە سەرپىندى ۆولونتەرلىك قوعامداستىق بار. ۆولونتەرلەر ءارتۇرلى باعىتتاعى ءىس-شارالاردى وتكىزەدى. ءبىر ۆولونتەرلەر اتا-اناسىنىڭ قامقورلىعىنسىز قالعان بالالاردى وقىتسا، كەيبىرى جالعىزباستى زەينەتكەرلەرگە ارنالعان پانسيوناتتاردا شىعارماشىلىق كەشتەر ۇيىمداستىرادى، ال باسقالارى جانۋارلارعا نەمەسە قورشاعان ورتاعا كومەكتەسەدى»، - دەدى ب.اناربايەۆا.
ۆولونتەرلەر سوڭعى سۋ تاسقىنى كەزىندە ەرەكشە بەلسەندىلىك تانىتىپ، زارداپ شەككەن ايماقتارعا 592 توننا گۋمانيتارلىق كومەك جيناپ، جىبەرگەنى اتاپ ءوتىلدى.
«جيىن پۋنكتىنىڭ جۇمىسىنا «Qamqor Charity»، «قازاقستان ەرىكتىلەر ليگاسى»، «Newman»، «تەپلو»، «حالىق» سياقتى 30-دان استام ءىرى قايىرىمدىلىق قورلارى مەن ۆولونتەرلىك ۇيىمدار، 200-دەن استام ۆولونتەرلەر مەن راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ 100 كۋرسانتى تارتىلدى. گۋمانيتارلىق كومەك جيناۋدىڭ العاشقى كۇندەرىنەن باستاپ ۇلكەن بەلسەندىلىك پەن الاڭداۋشىلىق تانىتقان الماتى قالاسىنىڭ تۇرعىندارىنا العىس بىلدىرگىم كەلەدى»، - دەپ اتاپ ءوتتى ول.
جىلى مەزگىلدە قالانىڭ بارلىق اۋداندارىندا ۆولونتەرلەر وتاندىق فيلمدەردىڭ تەگىن كورسەتىلىمدەرىن ۇيىمداستىرادى. سونىمەن، جازعى ماۋسىمنىڭ باسىنان باستاپ 10 000-نان استام ادامدى قامتيتىن 40-تان استام اشىق اسپان استىنداعى فيلمدەر كورسەتىلدى.
سونداي-اق، ۆولونتەرلەر اتا-اناسىنىڭ قامقورلىعىنسىز قالعان بالالارعا ارنالعان كوپتەگەن قىسقا مەرزىمدى وقىتۋ كۋرستارىن وتكىزەدى. جىل باسىنان بەرى ماركەتينگ، قارجىلىق ساۋاتتىلىق، موبيلوگرافيا سياقتى باعىتتار بويىنشا وقىتۋ جۇرگىزىلدى.
«ۆولونتەرلىك قىزمەت جەكە جانە كاسىبي دامۋ ءۇشىن جانە ۆولونتەرلەردىڭ وزدەرى ءۇشىن تاماشا مۇمكىندىكتەر بەرەتىنىن اتاپ وتكەن ءجون. ولار باسقالارعا كومەكتەسىپ قانا قويمايدى، سونىمەن قاتار كوشباسشىلىق، كوممۋنيكاسيا، جوبالاردى باسقارۋ داعدىلارىن دامىتادى. ۆولونتەرلەردى جان-جاقتى دامىتۋ ءۇشىن ۆولونتەرلەردىڭ ءفرونت-وفيسى بازاسىندا جۇيەلى نەگىزدە ترەنينگتەر، شەبەرلىك سىنىپتارى مەن وقىتۋ كۋرستارى وتكىزىلەدى»، - دەپ ءبولىستى ب.اناربايەۆا.
وسىلايشا، بيىل الماتى قالاسى توتەنشە جاعدايلار دەپارتامەنتىمەن بىرلەسە وتىرىپ، ۆولونتەرلەر توتەنشە جاعدايلار كەزىندە كومەك كورسەتۋ بويىنشا وقۋدان ءوتتى. بارلىعى 700-دەن استام ۆولونتەر ءارتۇرلى باعىتتار بويىنشا وقىتىلدى.
قورىتىندىلاي كەلە، سپيكەر مەگاپوليستە جاقىن ارادا «يگى ىستەر مارافونى» باستالاتىنىن، ونىڭ اياسىندا ءتۇرلى قايىرىمدىلىق جانە ەرىكتىلەر اكسيالارى ۇيىمداستىرىلاتىنىن حابارلادى.
ەستەرىڭىزگە سالا كەتەيىك، الماتى قالاسىنداعى ۆولونتەرلەر ءفرونت-وفيسىنىڭ قىزمەتى الماتى قالاسى جاستار ساياساتى ماسەلەلەرى باسقارماسىنىڭ قولداۋىمەن جۇزەگە اسىرىلادى.