مادەنيەت جانە اقپارات مينيسترلىگى سۋ تاسقىنىنا قارسى ءىس-شارالار جانە ونىڭ زارداپتارىن جويۋ جونىندەگى رەسپۋبليكالىق شتاب اياسىندا زارداپ شەككەندەرگە كومەك كورسەتۋ جۇمىسىن جالعاستىرۋدا.
سۋ تاسقىنىنا قارسى ءىس-شارالار باستالعاننان بەرى مينيسترلىك «كۇشىمىز بىرلىكتە» اكسياسىن باستادى. اكسياعا ۇلتتىق ۆولونتەرلەر جەلىسى، ۆولونتەرلىك جانە جاستار ۇيىمدارى، ءدىني، ەتنومادەني جانە قايىرىمدىلىق ۇيىمدارى وكىلدەرى قولداۋ كورسەتتى، دەپ حابارلايدى Almaty-akshamy.kz ق ر مادەنيەت جانە اقپارات مينيسترلىگىنە سىلتەمە جاساپ.
بارلىق وڭىردە جەدەل ۆولونتەرلىك شتابتار قۇرىلىپ، ولاردىڭ جۇمىسىنا 50 مىڭنان استام ۆولونتەر تارتىلدى.
زارداپ شەككەندەرگە كومەك كورسەتۋدى جانە ەرىكتىلەردى جەر-جەرگە ءبولىپ، ۇيلەستىرۋ ءۇشىن ءبىرىڭعاي بايلانىس ورتالىعى (+7 708 706 4242) جۇمىس ىستەيدى. سۋ تاسقىنىنا قارسى ءىس-شارالار باستالعاننان بەرى وبلىستاردان 1000-نان استام قوڭىراۋ تۇسكەن.
العاشقى كۇندەردەن باستاپ، ۆولونتەرلەر بىرلەسىپ ازىرلەنگەن ءوزارا ارەكەت ەتۋ الگوريتمىنە سايكەس، وڭىرلىك توتەنشە جاعدايلار دەپارتامەنتتەرىنە كومەك كورسەتىپ جاتىر.
ۆولونتەرلەر تجد-مەن بىرلەسىپ، سۋ باسقان اۋماقتاردان ازاماتتاردى ەۆاكۋاسيالاۋ بويىنشا جۇمىس جۇرگىزۋدە، ازىق-تۇلىك پەن ءبىرىنشى كەزەكتەگى قاجەتتى زاتتاردى جەتكىزۋگە اتسالىسىپ، زارداپ شەككەن ازاماتتارعا العاشقى كومەك كورسەتىپ جاتىر.
سونداي-اق ۇلتتىق ۆولونتەرلەر جەلىسى ساراپشىلارمەن بىرلەسىپ، مۇقتاج ازاماتتارعا پسيحولوگيالىق جانە زاڭگەرلىك كومەك ۇيىمداستىردى.
گۋمانيتارلىق كومەك جيناۋ پۋنكتتەرى 16 وڭىردە جۇمىس ىستەيدى: استانا، الماتى، شىمكەنت، اتىراۋ، اقتوبە، اقمولا، الماتى، جامبىل، قوستاناي، قىزىلوردا، باتىس قازاقستان، ماڭعىستاۋ، پاۆلودار، شىعىس قازاقستان، تۇركىستان وبلىستارى جانە جەتىسۋ وبلىستارى. ۆولونتەرلەر 10 520 توننا گۋمانيتارلىق كومەك جينادى. 8905 توننا زارداپ شەككەن ايماقتارعا جەتكىزىلدى. گۋمانيتارلىق كومەكتىڭ قالعان بولىگى جاقىن ارادا جىبەرىلەدى.