سونداي-اق اكادەميالىق كرەديتتەر ەسەپتەلۋى مۇمكىن.
قازاقستاندا ۆولونتەر ستۋدەنتتەردى ماتەريالدىق ىنتالاندىرۋ جۇيەسى ەنگىزىلدى. ەندى ۆولونتەرلىك قىزمەتپەن بەلسەندى اينالىساتىن ءبىلىم الۋشىلار اتقارعان ەڭبەگى ءۇشىن اقشالاي سىياقى الا باستايدى، دەپ حابارلايدى Almaty-akshamy.kz ق ر ءبىلىم جانە عىلىم مينيسترلىگىنە سىلتەمە جاساپ.
بۇل شەشىم الەۋمەتتىك ماڭىزدى قىزمەتپەن اينالىساتىن بەلسەندى ستۋدەنتتەردىڭ سانىن كوبەيتۋ ماقساتىندا قابىلدانىپ وتىر. مىسالى، مۇقتاج ادامدارعا كومەك كورسەتىپ جۇرگەن، ءتۇرلى الەۋمەتتىك جوبالاردى جۇزەگە اسىراتىن ستۋدەنتتەر از ەمەس.
«مينيسترلىك جاستار باستامالارىنا ەرەكشە دەن قويىپ، ولاردى قولدايدى. ماسەلەن، ەندى 20 ساعاتتىق ۆولونتەرلىك قىزمەت ءۇشىن ستۋدەنتتەرگە ۆاۋچەر تۇرىندە كرەديت بەرىلەدى. بۇل ستۋدەنت وقيتىن جوعارى وقۋ ورنىندا/ءبىلىم بەرۋ ۇيىمىندا ەكى اكادەميالىق كرەديتتى (ساعاتتى) ەسەپكە الۋعا مۇمكىندىك بەرەدى. سونداي-اق ستۋدەنت 20 000 تەڭگە مولشەرىندە ءبىرجولعى اقشالاي تولەم الادى. ەگەر ستۋدەنت 50 ساعات جۇمىس ىستەسە، وعان بەس اكادەميالىق كرەديت (ساعات) ەسەپتەلىپ، 50 000 تەڭگە تولەنەدى»، – دەدى ق ر بعم «قارجى ورتالىعى» اق باسقارما ءتوراعاسى اسقار يبرايموۆ.
ايتا كەتەيىك، ۆولونتەر ستۋدەنتتەرگە ارنالعان تولەمدەر تىلدەردى وقىتۋ جانە كومپيۋتەرلىك ساۋاتتىلىق بويىنشا رەپەتيتورلىق قىزمەت ءۇشىن، ەرەكشە ءبىلىم بەرۋ قاجەتتىلىگى بار بالالارمەن جۇمىس، سونىمەن بىرگە اۋلا جانە سپورت كلۋبتارىن ۇيىمداستىرعانى ءۇشىن، بالالار، قارتتار جانە مۇمكىندىگى شەكتەۋلى ادامدارمەن جۇرگىزىلگەن الەۋمەتتىك جۇمىس، قورشاعان ورتانى قورعاۋ جانە باسقا دا قىزمەتتەر ءۇشىن قاراستىرىلعان. ۆولونتەر-ستۋدەنتتەردى كوتەرمەلەۋ جۇيەسىن ەنگىزۋ – جاستار اراسىندا الەۋمەتتىك جاۋاپكەرشىلىكتى دامىتۋ جانە قازاقستاندا ۆولونتەرلەر قوزعالىسىن ىلگەرىلەتۋ بارىسىندا جاڭا سەرپىن بولماق.