ۆولەيبولدان الەم چەمپيوناتى: قازاقستان قۇراماسى گەرمانياعا ەسە جىبەردى

ەندى ەل قۇراماسى 29 قىركۇيەكتە كانادامەن كەزدەسەدى

قازاقستان قۇراماسى ۆولەيبولدان ايەلدەر اراسىنداعى الەم چەمپيوناتىندا ەكىنشى كەزدەسۋىن گەرمانياعا قارسى وتكىزدى، دەپ حابارلايدى Almaty-akshamy.kz قازاقپاراتا سىلتەمە جاساپ.

بۇگىنگى كەزدەسۋدە قازاقستاندىق ۆولەيبولشىلار تاجىريبەلى قارسىلاسىنا لايىقتى دەڭگەيدە ويىن كورسەتتى. گەرمانيا قۇراماسى ەۋروپا چەمپيوناتىندا ءتورت مارتە جۇلدەگەر قاتارىنان كورىنگەن. سونداي-اق گران-پري جانە ەۋروليگا تۋرنيرىندە جەتىستىككە جەتتى.

سوندىقتان ەل قۇراماسىنا ولارمەن ويىن وڭايعا تۇسكەن جوق. العاشقى ەكى سەتتە قازاقستاندىق ۆولەيبولشىلار قارسىلاسىنا 15:25، 18:25 ەسەبىمەن ەسە جىبەرىپ قويدى.

ال ءۇشىنشى سەتتە تارتىستى ويىن ءوتتى. ناتيجەسىندە گەرمانيالىقتاردىڭ باسىمدىعىمەن اتالعان سەت 21:25 ەسەبىمەن اياقتالدى.
قازاقستاندىق ۆولەيبولشىلار س توبىندا سىنعا تۇسەتىنى بەلگىلى. قارسىلاستارى – اقش، سەربيا، گەرمانيا، بولگاريا جانە كانادا.

ەندى ەل قۇراماسى 29 قىركۇيەكتە كانادامەن كەزدەسەدى.

ءدۇبىرلى دودا نيدەرلاند جانە پولشا مەملەكەتتەرىندە 23 قىركۇيەك پەن 15 قازان ارالىعىندا وتكىزىلەدى. وندا بارلىعى 24 قۇراما قاتىسىپ، ءتورت توپتا ب ا ق سىنايدى.

ەسكە سالساق، بۇدان بۇرىن قازاقستاندىق ۆولەيبولشىلار اقش-تان جەڭىلىپ قالعان ەدى.