بەلگىلى عالىم تەك بيە سۇتىندە كەزدەسەتىن پايدالى ەلەمەنتتەردى اتادى

بيە سۇتىندە كەرەمەت گامما – لينولەن دەگەن قىشقىل بار

قازاق تاعامتانۋ اكادەمياسىنىڭ پرەزيدەنتى، عالىم تورەگەلدى شارمانوۆ بيە ءسۇتىنىڭ پايدالى قاسيەتى تۋرالى ايتتى دەپ حابارلادى Almaty-akshamy.kz turkystan.kz-كە سىلتەمە جاساپ.

عالىمنىڭ ايتۋىنشا، بيە ءسۇتى استى جەڭىل قورىتادى. بيە سۇتىندەگى ماي قانىقپاعان. ترانسيزومەر جوق. ول – قازىرگى زاماندا ادام دەنساۋلىعىنا پايدالى قاسيەت.

«جالپى العاندا، بيە ءسۇتىنىڭ قاسيەتى مەن قۇرامى وسى ۋاقىتقا دەيىن ءوزىنىڭ لايىقتى باعاسىن الماي كەلەدى. بۇگىنگە دەيىن بيە ءسۇتى تەك قىمىز، ساۋمال رەتىندە پايدالانىلۋدا. ونىڭ قۇرامى كوپتەگەن سيرەك كەزدەسەتىن حيميالىق ەلەمەنتتەرگە، دارۋمەندەرگە، مينەرالدىق زاتتەكتەر مەن فەرمەنتتەرگە باي جانە ولاردىڭ ايرىقشا فيزيولوگيالىق بىرىگۋىمەن بەرىلگەن. پايدالى ەلەمەنتتەردىڭ وسىنداي ەرەكشە بىرىگۋى تابيعاتتا باسقا جانۋارلاردىڭ سۇتىندە كەزدەسپەيتىن، تەك بيە سۇتىنە عانا ءتان قۇبىلىس»، – دەدى تورەگەلدى شارمانوۆ.

بيە سۇتىندە انىقتالعان بروم ۇيقىسىزدىق، دەپرەسسيا سەكىلدى جۇيكە جۇيەسى اۋرۋلارىن كەشەندى ەمدەۋدە قولدانۋعا بولادى. بيە ءسۇتىنىڭ تاعى ءبىر ەرەكشەلىگى، ول قايناتۋعا كەلمەيدى، وعان ستەريليزاسيا، پاستەريليزاسيا جاساۋعا بولمايدى. ال باسقا جانۋارلاردىڭ سۇتتەرىن، مىسالى، سيىر، ەشكى، قوي سۇتتەرىن مىندەتتى تۇردە قايناتۋ، پاستەريليزاسيالاۋ قاجەت.

«بيە سۇتىندە كەرەمەت گامما – لينولەن دەگەن قىشقىل بار. بۇل كەرەمەت دۇنيە، ونىڭ قۇرامى «ومەگا-6-دان» تۇرادى. ول اتەروسكلەروزعا، باكتەريالار مەن ۆيرۋستارعا قارسى ارەكەت ەتۋىنە بايلانىستى جۇقپالى اۋرۋلاردان قورعايدى، اعزا ءۇشىن يممۋنيتەتتى ارتتىراتىن قورعانىستىق قاسيەتى باسىم»، – دەيدى عالىم.