رەسەي پرەزيدەنتى ۆلاديمير پۋتين ازەربايجان پرەزيدەنتى يلحام الييەۆتەن كەشىرىم سۇرادى، دەپ حابارلايدى رەسەي سىرتقى ىستەر مينيسترلىگىنىڭ باسپا ءسوز قىزمەتى.
رەسەي تاراپىنىڭ باستاماسىمەن رەسەي فەدەراسياسىنىڭ پرەزيدەنتى ۆلاديمير پۋتين مەن ازەربايجان رەسپۋبليكاسىنىڭ پرەزيدەنتى يلحام الييەۆ اراسىندا تەلەفون ارقىلى اڭگىمە ءوتتى. ۆلاديمير پۋتين بۇل قايعىلى وقيعانىڭ رەسەي اۋە كەڭىستىگىندە بولعانىنا بايلانىستى كەشىرىم سۇراپ، قازا تاپقانداردىڭ وتباسىلارىنا تەرەڭ جانە شىنايى كوڭىل ايتتى، سونداي-اق جاراقات العاندارعا تەز ساۋىعىپ كەتۋىن تىلەدى.
اڭگىمە بارىسىندا اقتاۋدا بولعان ۇشاق اپاتىنا قاتىستى ماسەلەلەر تالقىلاندى.
ازەربايجاننىڭ جولاۋشىلار ۇشاعى كەستە بويىنشا ۇشىپ كەلىپ، گروزنىي اۋەجايىنا بىرنەشە رەت قونۋعا ارەكەت جاسادى. سول ۋاقىتتا گروزنىي، موزدوك جانە ۆلاديكاۆكاز قالالارى ۋكراينالىق ۇشقىشسىز ۇشۋ اپپاراتتارىنىڭ شابۋىلىنا ۇشىرادى، ال رەسەيدىڭ اۋە قورعانىس جۇيەلەرى بۇل شابۋىلداردى تويتارىس بەرۋگە تىرىستى، دەپ حابارلادى رەسەي ءسىم.
رەسەي تەرگەۋ كوميتەتى قىلمىستىق كودەكستىڭ 263-بابى بويىنشا (كولىك قوزعالىسى جانە اۋە كولىگى پايدالانۋ قاۋىپسىزدىگى ەرەجەلەرىن بۇزۋ) قىلمىستىق ءىس قوزعادى. العاشقى تەرگەۋ ارەكەتتەرى جۇرگىزىلۋدە، ازاماتتىق جانە اسكەري مامانداردان جاۋاپ الىنۋدا.
ازەربايجان باس پروكۋراتۋراسىنىڭ ەكى قىزمەتكەرى گروزنىي قالاسىنا بارىپ، رەسەي فەدەراسياسىنىڭ باس پروكۋراتۋراسى جانە تەرگەۋ كوميتەتى وكىلدەرىمەن بىرلەسىپ جۇمىس ىستەپ جاتىر.
ازەربايجان پرەزيدەنتىنىڭ باسپا ءسوز قىزمەتى ءپۋتيننىڭ رەسەي اۋە كەڭىستىگىندە رەيسكە سىرتقى فيزيكالىق جانە تەحنيكالىق اسەر جاسالعانىنا بايلانىستى كەشىرىم سۇراعانىن راستادى.