كوكتەمگى ۆيتامين تاپشىلىعى: الماتىلىقتارعا اعزانى قالاي دارۋمەندەرمەن تولىقتىرۋعا بولاتىنى ايتىلدى
ماۋسىم اۋىسقان كەزدە ادامدا دارۋمەن تاپشىلىعى تۋىندايدى، ادامداردىڭ 80% - نا دەيىن وسىعان ۇشىرايدى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىندە №11 قالالىق ەمحانا ديرەكتورىنىڭ ورىنباسارى الماش اردابايەۆا ايتتى، دەپ حابارلايدى اlmaty-akshamy.kz.
ۆيتامين تاپشىلىعى دەنساۋلىقتىڭ ناشارلاۋىنا، يممۋنيتەتتىڭ تومەندەۋىنە جانە سونىڭ سالدارىنان اۋرۋلارعا اكەلۋى مۇمكىن.
وكق ساراپشىسى «ۆيتامين تاپشىلىعى» دەگەننەن گورى، بۇل قۇبىلىستى «گيپوۆيتامينوز» - اعزاداعى دارۋمەندەردىڭ تومەن دەڭگەيى دەپ اتاعان دۇرىس دەيدى. بۇل كليماتتىڭ ەرەكشەلىكتەرىنە، ءومىر سالتىنا جانە تاعامعا دەگەن تالعامعا تىكەلەي بايلانىستى.
كوكتەمگى ۆيتامين تاپشىلىعىنىڭ بەلگىلەرى:
- اپاتيا جانە بۇرىن ءلاززات العان نارسەلەر مەن ارەكەتتەرگە قىزىعۋشىلىقتى جوعالتۋ؛
- سۋىق تيۋ جانە مۇرىننان سۋ اعۋ جيىلەيدى؛
- ءبىر نەمەسە بىرنەشە سوزىلمالى اۋرۋلاردىڭ ءورشۋى؛
- ۇيىقتاپ كەتۋ قيىندايدى، ال تاڭەرتەڭ ۇيقىدان تۇرۋ ودان دا قيىن بولادى؛
- تۇندە ساعات 2:30-دان 3:30-عا دەيىن ءجيى ويانۋ؛
- تەرىدە بەزەۋدىڭ پايدا بولۋى نەمەسە تەرىنىڭ شامادان تىس قۇرعاۋى؛
- شاشتىڭ سىنۋى جانە تىرناقتىڭ ءبولىنۋى؛
- ءىش قاتۋ، بۇزىلۋ جانە گاستريت تۇرىندە اسقازان-ىشەك جولدارىندا بۇزىلىستىڭ پايدا بولۋى؛
- قىزىل يەكتىڭ كەنەتتەن قاناپ كەتۋى؛
- زەيىننىڭ بولماۋى؛
- باستىڭ ءجيى اۋىرۋى؛
- قۇلاقتىڭ شۋلاۋى جانە جەڭىل باس اينالۋ.
«وسى تىزىمدەگى كەمىندە ەكى بەلگى بولسا، ول كوكتەمگى اۆيتامينوزبەن جەدەل كۇرەسۋ قاجەتتىگىن بىلدىرەدى»، - دەدى الماش اردابايەۆا.
كوكتەمگى ۆيتامين تاپشىلىعى ەرەسەكتەردە عانا ەمەس، بالالاردا دا كورىنەدى. وسى كەزەڭدە ادامنىڭ ءوزىن قالاي سەزىنەتىنىنە ءمان بەرۋ كەرەك.
دەنەنىڭ «ۆيتاميندىك» ءال - اۋقاتىنىڭ ماڭىزدى كەپىلدىكتەرىنىڭ ءبىرى – ول دۇرىس جانە تەڭدەستىرىلگەن تاماقتانۋ.
ساراپشى ديەتاعا كوبىرەك بالىق، جاڭا سىعىلعان شىرىندار، ءتۇرلى كوكونىستەر، جەمىستەر مەن شوپتەردى قوسۋدى ۇسىنادى. كونسەرۆىلەنگەن تاعامداردان باس تارتقان ءجون. اعزاداعى دارۋمەندەردىڭ دەڭگەيىن باقىلاۋ ماڭىزدى.
تەڭدەستىرىلگەن ديەتادان باسقا، تازا اۋادا ءجيى سەرۋەندەۋ جانە تۇراقتى سپورتتىق جاتتىعۋلار ۆيتامين تاپشىلىعىن جەڭۋگە كومەكتەسەدى.
«ەسىڭىزدە بولسىن، ۆيتامين تاپشىلىعىنىڭ نازاردان تىس قالعان بەلگىلەرى اۋرۋحاناعا جاتقىزۋعا دەيىن اپاراتىن مەديسينالىق ارالاسۋدى قاجەت ەتەتىن اۋىر اۋرۋلارعا اكەلۋى مۇمكىن»، - دەپ ەسكەرتتى ول.
دارۋمەن تاپشىلىعى سالدارىنان بولعان انگينا (تونزيلليت)، سۋىق تيۋ بەلگىلەرى، مۇرىننىڭ ءبىتۋى، قۇلاقتىڭ قابىنۋى (وتيت) سياقتى اۋرۋلاردان ەمدەلۋدە لور-دارىگەر كومەكتەسەدى.