ۆەتنامدىق كومپانيا ەلىمىزدەن ساۋدا-لوگيستيكا ورتالىعىن اشۋعا نيەتتى

VietJet Air لوۋكوستەرى دە قازاقستانعا اۋە رەيستەرىن اشۋدى جوسپارلاپ وتىر.

ۆەتنامدا رەسمي ساپارمەن جۇرگەن مەملەكەت باسشىسى قاسىم-جومارت توقايەۆ SOVICO Group باسقارما ءتوراعاسى نگۋەن تحان حۋنگتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.

كەزدەسۋ بارىسىندا ەنەرگەتيكا جانە لوگيستيكا سالالارىنداعى ىنتىماقتاستىقتىڭ پەرسپەكتيۆتى باعىتتارى تالقىلاندى.

توقايەۆ كومپانيا ەكونوميكانىڭ ءتۇرلى سەكتورىندا زور تاجىريبەگە يە ەكەنىن اتاپ ءوتىپ، ەلىمىز ءىرى ينۆەستيسيالىق جوبالاردى بىرلەسە جۇزەگە اسىرۋعا مۇددەلى ەكەنىنە نازار اۋداردى.

ءوز كەزەگىندە نگۋەن تحان حۋنگ كومپانيانىڭ قازاقستان اۋماعىندا ساۋدا-لوگيستيكالىق ورتالىعىن اشۋعا نيەتى بارىن ايتتى. بۇدان بولەك، SOVICO كومپانيالار توبىنا كىرەتىن VietJet Air لوۋكوستەرى قازاقستانمەن اراداعى اۋە قاتىناستارىنىڭ سانىن ارتتىرۋدى جوسپارلاپ وتىر.

پرەزيدەنت ۆەتنامدىق كومپانيانىڭ الداعى جوسپارلارىن قۇپتاپ، ينۆەستيسيالىق جوبالاردى جۇزەگە اسىرۋ ءۇشىن ەلىمىزدىڭ ۇكىمەتى تاراپىنان جان-جاقتى كولداۋ كورسەتىلەتىنىنە سەنىم ءبىلدىردى.

SOVICO Group – ۆەتنامداعى ەڭ ءىرى ءارتاراپتاندىرىلعان كونگلومەراتتاردىڭ ءبىرى. كومپانيا ەنەرگەتيكا، قۇرىلىس، بانك جانە قارجى، اۆياسيا سالالارىندا ءتۇرلى جوبالاردى جۇزەگە اسىرادى. 2022 جىلى كومپانيانىڭ تابىسى 20،6 ميلليارد دوللاردى قۇرادى.