بايقوڭىر – ادامزات ءۇشىن عارىش يگەرۋدىڭ بەسىگى.
ۆەنانىڭ تەحنيكالىق مۋزەيىندە قازاقستاننىڭ اۋسترياداعى ەلشىلىگى اۋستريانىڭ كولىك، يننوۆاسيا جانە تەحنولوگيا مينيسترلىگىنىڭ قولداۋىمەن قۇرامىنا عارىشكەر توقتار اۋباكىروۆ، اۋستريالىق عارىشكەر فرانس فيبەك جانە ەكيپاج كومانديرى الەكساندر ۆولكوۆ كىرگەن «اۆسترومير» اتتى عارىش ەكسپەديسياسىنىڭ 30 جىلدىق مەرەيتويىن مەرەكەلەۋگە ارنالعان ءىس-شارا ءوتتى، دەپ حابارلايدى Almaty-akshamy.kz ق ر سىرتقى ىستەر مينيسترلىگىنە سىلتەمە جاساپ.
قازاقستان تاۋەلسىزدىگىنىڭ مەرەيتويى جىلىندا ەڭبەك سىڭىرگەن سىناۋشى-ۇشقىش، كەڭەس وداعىنىڭ باتىرى توقتار اۋباكىروۆ عارىش كەڭىستىگىندە بولعان قازاق حالقىنىڭ العاشقى وكىلى اتالعانىنا دا 30 جىل تولادى. وسى ەرلىگى ءۇشىن ول «حالىق قاھارمانى» اتاعىنا يە بولدى.
1991 جىلدىڭ 2 قازانى عارىشقا تۇڭعىش رەت وتانداستارىن جىبەرگەن ەكى ەل – قازاقستان مەن اۋستريا ءۇشىن تاريحي كۇن بولدى.
قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ شاقىرۋىمەن بايقوڭىر عارىش ايلاعىنا كوپتەگەن وداقتاس رەسپۋبليكالاردىڭ باسشىلارى جانە اۋستريا كانسلەرى فرانس ۆرانيسكيي ۇشىپ كەلدى.
ۆەنادا وتكەن ءىس-شاراعا اۋستريانىڭ كولىك، يننوۆاسيا جانە تەحنولوگيا فەدەرالدى ءمينيسترى لەونورا گيەۆەسسلەر، اۋستريالىق عارىشكەر فرانس فيبەك، (بەينەبايلانىس ارقىلى) قازاقستاندىق ۇشقىش-عارىشكەر توقتار اۋباكىروۆ، ۆەنا تەحنيكالىق مۋزەيىنىڭ باس ديرەكتورى، سونداي-اق عارىشكەرلىك سالاسىنداعى عالىمدار مەن زەرتتەۋشىلەر قاتىستى.
پانەلدىك سەسسيا بارىسىندا قاتىسۋشىلار عارىشقا دايىندىق، ۇشۋ، بولۋ تاريحىمەن ءبولىسىپ، عارىش سالاسىنىڭ ەڭ وزەكتى ماسەلەلەرىن، ونىڭ ىشىندە زاماناۋي عارىش قىزمەتىنىڭ قيىندىقتارى مەن عارىش زەرتتەۋلەرىنىڭ پەرسپەكتيۆالارىن تالقىلادى.
ءوزىنىڭ بەينە ۇندەۋى اياسىندا ت. اۋباكىروۆ اۋستريالىقتاردى جانە ءوزىنىڭ ارىپتەسى، جاقىن دوسى ف. فيبەكتى ەكسپەديسيا كۇنىنىڭ مەرەيتويىمەن قۇتتىقتاپ، بايقوڭىر قالاسىندا وتكەن دايىندىق، ەكيپاجبەن ۇزاق عۇمىر كەشكەن بەرىك دوستىق پەن عارىشقا شىعارىپ سالۋ تۋرالى جىلى ەستەلىكتەرىمەن ءبولىستى. سونداي-اق، حالقىمىزدىڭ قوناقجايلىلىعى مەن اقكوڭىلدىگىن ەرەكشە اتاپ ءوتىپ، اۋستريالىقتاردى قازاقستانعا كەلۋگە شاقىردى.
قازاقستاننىڭ ۆەناداعى ەلشىسى قايرات وماروۆ ءوزىنىڭ قۇتتىقتاۋ سوزىندە «ت. اۋباكىروۆتىڭ ۇشۋى حالقىمىز ءۇشىن ەرەكشە ماقتانىشقا اينالىپ، قازاقستاننىڭ مەملەكەتتىك تاۋەلسىزدىك الۋىمەن قاتار جۇرگەن ۇلتتىق سانا-سەزىمنىڭ قۋاتتى سەرپىلىسىنىڭ ءبىر بولىگى بولدى. بۇل ۇشۋ ەلىمىزدىڭ عارىشتى يگەرۋدەگى ايرىقشا ءرولىنىڭ كورىنىسى دە بولدى، سەبەبى جەر وربيتاسىنا بارلىق الەمدىك ۇشىرۋلاردىڭ جارتىسىنان كوبىن قامتاماسىز ەتكەن بايقوڭىر – ادامزات ءۇشىن عارىش يگەرۋدىڭ بەسىگى»، - دەدى.
قازاقستاندىق عارىشكەرلەردىڭ جەتىستىكتەرى تاۋەلسىزدىگىمىزدىڭ العاشقى كەزەڭىندە حالقىمىزدىڭ رۋحىن كوتەرىپ، تەرەڭ زەردەلەنىپ، ەستە ساقتالۋى ءتيىس ەلىمىزدىڭ جاڭا تاريحىنىڭ اينىماس بولىگىنە اينالدى. قاسىم-جومارت توقايەۆ ءوزىنىڭ «تاۋەلسىزدىك بارىنەن قىمبات» اتتى ماقالاسىندا ءدال وسى فيلوسوفيانى – تاريحتى تانىپ، حالىقارالىق ارەنادا ءوز جەتىستىكتەرىمەن قازاقستاننىڭ اتاعىن شىعارعان ازاماتتاردى ءبىلۋ دەپ اتاپ كورسەتەدى.
جاريالانعان كۇنى