ۆەلوسيپەدشىگە قانداي جاعدايدا ايىپپۇل سالىنادى – جول ەرەجەسىنىڭ نەگىزگى تالاپتارى
قازاقستانداعى ۆەلوسيپەدكە قاتىستى جول ەرەجەسىنىڭ نەگىزگى تالاپتارىن نازارلارىڭىزعا ۇسىنامىز.
ءبىر قاتارمەن ءجۇرۋ كەرەك
قازاقستاندا ۆەلوسيپەد پەن موپەد ءۇشىن ورتاق ەرەجە بار. ءبىر ايىرماشىلىعى، موپەدكە 16 جاسقا تولعان ادامدار عانا مىنە الادى. ال ۆەلوسيپەدشىگە ونداي تالاپ قويىلمايدى.
ەرەجەگە سايكەس، ۆەلوسيپەد ءۇشىن ارنايى جول بولماسا، جولدىڭ وڭ جاعىمەن جۇرۋگە بولادى. جول جيەگىمەن دە جۇرۋگە رۇقسات. ءبىراق جاياۋ جۇرگiنشiلەرگە كەدەرگi كەلتiرمەۋ كەرەك.
ۆەلوسيپەد مىنگەن ادامدار بiر قاتارمەن جۇرۋگە ءتيىس. ال ۆەلوسيپەدشىلەر كوپ بولعان جاعدايدا ون ادامعا ءبولىنىپ، توپپەن قوزعالعان ءجون. سوسىن بىر-بىرىنەن باسىپ وزۋدى جەڭiلدەتۋ ءۇشiن توپتاردىڭ اراقاشىقتىعى 80-100 م بولۋى شارت.
ۆەلوسيپەدشىنىڭ مىندەتتەرى
جول ءجۇرۋ ەرەجەسىنىڭ 24-بابىنا سايكەس، ۆەلوسيپەد پەن موپەد جۇرگiزۋشiلەرiنە بىرنەشە تالاپتى قاتاڭ ساقتاۋى قاجەت. ونى بۇزعان جاعدايدا ايىپپۇل سالىنادى. نەگىزگى شەكتەۋلەر:
- رۋلدەن ۇستاماي جۇرۋگە؛
- جولاۋشى تاسىمالداۋعا؛
- ۇزىندىعىنان نەمەسە ەنi جاعىنان 0،5 مەترگە ارتىق شىعىپ تۇراتىن جۇكتەردi نەمەسە باسقارۋعا كەدەرگi كەلتiرەتiن جۇكتەردi تاسىمالداۋعا؛
- ۆەلوسيپەد جولاعى بولعاندا جولمەن جۇرۋگە؛
- بiر جول جولاعىنان ارتىق بولعاندا سولعا بۇرىلۋعا نەمەسە كەرi بۇرىلۋعا؛
- اۆتوماگيسترالمەن جۇرۋگە تىيىم سالىنادى.
سونداي-اق ۆەلوسيپەد جولاعى مەن جول قيىلىسقان جەردە باعدارشام بولماسا، كولىككە جول بەرۋ كەرەك.
ايىپپۇلدىڭ كولەمى قانداي
قازاقستاننىڭ زاڭناماسى بويىنشا ۆەلوسيپەدشىلەر اكىمشىلىك قۇقىق بۇزۋشىلىق تۋرالى كودەكستىڭ 615-بابى (جاياۋ جۇرگiنشiلەردiڭ جانە جول جۇرىسىنە وزگە دە قاتىسۋشىلاردىڭ جول ءجۇرىسى قاعيدالارىن بۇزۋى) بويىنشا جاۋاپ بەرەدى. جول ەرەجەسىن بۇزعانى ءۇشىن 2 اەك (6 900 تەڭگە) كولەمىندە ايىپپۇل قاراستىرىلعان. ال ءجابiرلەنۋشiنiڭ دەنساۋلىعىنا زيان نەمەسە ماتەريالدىق زالال كەلگەن جاعدايدا 10 اەك (34 500 تەڭگە) تولەۋگە تۋرا كەلەدى.
ءتارتىپ بۇزۋشىلىق ءبىر جىلدىڭ ىشىندە قايتالانسا، 2 اەك بەس ەسەگە وسەدى. ال ماتەريالدىق زالال كەلگەن نەمەسە جابىرلەنۋشى جەڭىل جاراقات العان جاعدايدا 20 اەك (69 000 تەڭگە) كولەمىندە ايىپپۇل سالىنادى. ۆەلوجولاق بار جەردە تروتۋارمەن جۇرگەنى ءۇشىن جازا قاراستىرىلعان.
ۆەلوسيپەدشى جۇرگىزۋشى ەكەنىن ۇمىتپاۋ كەرەك
پوليسەيلەر ماڭىزدى ءبىر ماسەلەنى ۇمىتپاۋعا كەڭەس بەرىپ وتىر. جول ەرەجەسىنە سايكەس، ۆەلوسيپەدكە مىنگەن ادام جۇرگىزۋشى بولىپ سانالادى. ال ۆەلوسيپەدتى ۇستاپ كەلە جاتسا، جاياۋ جۇرگىنشىلەرگە جاتادى. سوعان قاراي اكىمشىلىك جازا دا قولدانىلادى.
"جولدا اباي بولىڭىزدار! تىيىم سالىنعان جەردەن وتۋگە بولمايدى. جولدى تەك جاياۋ جۇرگىنشىلەر جولاعىمەن كەسىپ ءوتىڭىز. ول كەزدە ۆەلوسيپەدتەن ءتۇسۋ كەرەك. سوسىن ۆەلوسيپەدكە شام مەن كاتافوت ورناتىپ قويعان دۇرىس. سوندا قاراڭعى تۇسكەندە جولدا كەلە جاتقانىڭىز الىستان كورىنەدى"، - دەيدى ءتارتىپ ساقشىلارى.
ايتا كەتەرى، اكىمشىلىك قۇقىق بۇزۋشىلىق تۋرالى كودەكستىڭ 28-بابى بويىنشا 16 جاسقا تولعان جانە اقىل-ەسi دۇرىس ادامدار جاۋاپقا تارتىلادى.