بۇل عىلىمي تۇردە دالەلدەندى.
330 مىڭ ادام گەنىنە تالداۋ جاساعاننان كەيىن امەريكالىق عالىمدار ۆەگەتاريانداردىڭ نە ءۇشىن وسىمدىك نەگىزىندەگى ديەتانى تاڭدايتىنىن انىقتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كوپ ادامدار جانۋارلارعا دەگەن جاناشىرلىقتان نەمەسە كومىرتەگى شىعارىندىسىن ازايتۋ سياقتى ەتيكالىق سەبەپتەرمەن وسىمدىك نەگىزىندەگى ديەتاعا اۋىسىپ جاتىر.
ءبىراق مۇنداي تاماقتانۋ جۇيەسىنە دەگەن قۇشتارلىق تۇقىم قۋالاۋى مۇمكىن بە؟ امەريكالىق عالىمدار وسى سۇراققا جاۋاپ ىزدەپ كوردى.
عالىمداردىڭ ايتۋىنشا، وسىمدىك تاعامدارىن تاڭداۋ ءبىزدىڭ گەنەتيكامىزعا نەگىزدەلۋى مۇمكىن.
سولتۇستىك-باتىس ۋنيۆەرسيتەتىنىڭ (اقش) پاتولوگيالىق اناتوميا كافەدراسىنىڭ پروفەسسورى نابيل ياسين باستاعان زەرتتەۋشىلەر توبى اۋقىمدى بيومەديسينالىق دەرەكتەر بازاسىن تالدادى.
ولار 40 پەن 69 جاس ارالىعىنداعى 5 324 ۆەگەتاريان مەن ۆەگەتاريان ەمەس 329 455 ادامنىڭ گەنومىن سالىستىردى.
«ءبىز ۆەگەتارياندىققا قاتىسى بار ءۇش گەندى انىقتادىق. تاعى 31 گەن ۆەگەتارياندىقپەن بايلانىستى بولۋى مۇمكىن»، — دەدى ياسين Euronews Next ارناسىنا.
گەنەتيكالىق نۇسقالاردىڭ ديەتانى تاڭداۋعا اسەر ەتۋ مەحانيزمدەرى مەتابوليزمنىڭ، فيزيولوگيانىڭ جانە ءدام قابىلداۋدىڭ ءوزارا ارەكەتىن قامتيدى.
«ديەتالىق تاعامداردى تاڭداۋ جانە تۇتىنۋ ءدامدى قابىلداۋعا بايلانىستى» دەلىنگەن زەرتتەۋدە.