ۆانداليزم جاساعاندارعا جاۋاپكەرشىلىك زاڭمەن كۇشەيەدى

بۇدان بىلاي ۆانداليزم جاساعاندار 600 ساعاتقا دەيىن قوعامدىق جۇمىسقا تارتىلادى.

بۇگىن ماجىلىستە ۆانداليزمگە قاتىستى جاۋاپكەرشىلىكتى قاتاڭداتۋ بويىنشا زاڭ قابىلداندى. مەملەكەت باسشىسى ۇلتتىق قۇرىلتايدا وسى ءتارتىپ بۇزۋشىلىقپەن كۇرەسۋ قاجەتتىگى تۋرالى ايتقان بولاتىن. جاڭا زاڭداعى باپتىڭ ەكىنشى بولىگى بويىنشا، 200-دەن 500 ايلىق ەسەپتىك كورسەتكىشكە دەيىن ايىپپۇل سالۋ نەمەسە تۇزەۋ جۇمىستارى، 300 ساعاتتان 600 ساعاتقا دەيىن قوعامدىق جۇمىستارعا تارتۋ نەمەسە 3 جىلعا دەيىن باس بوستاندىعىن شەكتەۋ، نە بولماسا ءدال سول مەرزىمگە باس بوستاندىعىنان ايىرۋ جازاسى قولدانىلماق، دەپ حابارلايدى Almaty-akshamy.kz.

مارات باشيموۆ، ق ر پارلامەنتى ءماجىلىسىنىڭ دەپۋتاتى:

كەيبىر ازاماتتار قوعامدىق ورىنداردى قالاي لاستاپ ءجۇردى ءالى دە سولاي جالعاستىرىپ جاتىر. سول سەبەپتى دە، دەپۋتاتتار زاڭعا ءبىرقاتار وزگەرىستەر ەنگىزدى. بۇل زاڭ جوباسى زاڭ بۇزۋشىلىقتاردىڭ الدىن الۋعا جانە ونى انىقتاۋعا وڭ ىقپال ەتەدى دەپ ەسەپتەيمىز.

كوممۋنالدىق قالدىقتاردى تاستاعانى ءۇشىن 10 اەك ايىپپۇل سالىنادى

سونداي-اق، ەندى بەلگىلەنبەگەن جەردە كوممۋنالدىق قالدىقتاردى تاستاعانى ءۇشىن 10 ايلىق ەسەپتىك كورسەتكىشتە ايىپپۇل سالىنادى. ياعني، «ورتاق پايدالانىلاتىن ورىنداردى لاستاۋ» بابى بويىنشا زاڭبۇزۋشىلىقتار ءۇشىن جازا ەكى ەسەگە ۇلعايتىلدى. ساياباقتاردى، سكۆەرلەردى لاستاعانى، ونىڭ ىشىندە بەلگىلەنبەگەن جەرلەرگە كوممۋنالدىق قالدىقتاردى تاستاعانى ءۇشىن 10 ايلىق ەسەپتىك كورسەتكىشتە ايىپپۇل سالىنادى، ال ءبىر جىل ىشىندە ەكىنشى رەت قايتالاعانسا ايىپپۇل دا ەكى ەسەلەنەدى.