الماتىدا وتكەن «مەنتالدى دەنساۋلىق جانە COVID-19» كونفەرەنسياسىندا ساراپشىلار ۆاكسينالاۋدان باس تارتۋ پروبلەماسى تۋرالى ءوز ويلارىن ورتاعا سالدى، دەپ حابارلايدى Almaty-akshamy.kz
«ۆ.م. بەحتەريەۆ اتىنداعى ۇلتتىق مەديسينالىق پسيحياتريا جانە نيەۆرولوگيا زەرتتەۋ ورتالىعىنىڭ» پسيحياتريا جانە شەكارالىق بۇزىلۋلاردى ەمدەۋ ءبولىمىنىڭ باس عىلىمي قىزمەتكەرى ۆسيەۆولود روزانوۆتىڭ ايتۋىنشا، سترەسس جاعدايىندا كەيبىر ادامداردا فانتاستيكالىق نەمەسە ميفولوگيالىق ويلاۋ قابىلەتى كۇشەيەدى.
«ارينە، ۆاكسيناعا قاتىستى قيىندىقتار بار، ءبىراق ءبىز تۇتاس ادامزات تۋرالى ويلانۋىمىز كەرەك. ءقازىر ادام ءوزىنىڭ جايلى جاعدايىنىڭ بۇزىلماۋىن قالايدى. ءبىراق ءبىز ەگويزم، ەگوسەنتريزم اۋىر سىناققا ۇشىراعان جاعدايعا تاپ بولىپ وتىرمىز. ءبىز تابيعاتتىڭ ءبىر بولىگى ەكەنىمىزدى، كەيدە وندا ءارتۇرلى جاعدايلار ورىن الاتىنىن ءتۇسىنۋىمىز قاجەت. ءاردايىم ەڭ ناشار جاعدايعا دايىن بولۋىمىز قاجەت. مەن مۇنى ءبىز ءقازىر وسىنداي تەندەنسيا ءجۇرىپ جاتقانىن ءتۇسىنۋىمىز ءۇشىن ايتىپ وتىرمىن»، - دەدى ول.
قازۇمۋ رەكتورى تالعات نۇرعوجين ۆاكسينالاۋ ميللياردتاعان ادامنىڭ ءومىرىن ساقتاپ قالعانىن اتاپ ءوتتى.
«قازاقستاندا ۆاكسينالاۋدىڭ ارقاسىندا ءومىر ءسۇرۋ ۇزاقتىعى 60 جاستان 74 جاسقا دەيىن ۇزاردى. ءححى عاسىردىڭ كەز كەلگەن يننوۆاسيالىق تەحنولوگياسى ميلليونداعان ادامنىڭ ءومىرىن ساقتايدى. ءبىراق، ۆاكسينالاۋ ميللياردتاعان ادامدى قۇتقارادى. بۇل ۆاكسينانىڭ قانداي پايداسى بار ەكەنىن ءتۇسىنۋ ءۇشىن جەتكىلىكتى. ءبىزدىڭ ۋنيۆەرسيتەتتە وقىتۋشىلار دا، باسقا قىزمەتكەرلەر مەن ستۋدەنتتەر دە 100 پايىز ەكپە سالدىردى. ءبىز ولاردى ىنتالاندىرمادىق، ءبىز دارىگەر رەتىندە ءوزىمىز ۇلگى كورسەتسەك، وندا حالىق سەنىم بىلدىرەتىنىن تۇسىنەمىز. وسىندا ءبىلىم الاتىن بالالاردىڭ ارقاسىندا 100 پايىز ەكپە الدىق جانە وفلاين رەجيمدە وقىپ جاتىرمىز»، - دەدى ول.
پسيحيكالىق دەنساۋلىق سالاسىندا جۇمىس ىستەيتىن ماماندار قاۋىمداستىعىنىڭ پرەزيدەنتى ساعات التىنبەكوۆ ۆاكسينالاۋ بۇكىل ادامزاتتىڭ ءومىر ءسۇرۋى ءۇشىن قاجەت ەكەنىن العا تارتتى.
«ەكپە سالدىرۋ - الەمدى امان الىپ قالۋ ءۇشىن مىندەتتى شارت. رەسەيدىڭ دە، قازاقستاننىڭ دا ءوز ەكپەسى بار، ءسويتىپ، جولى بولدى. بىزدە ۆاكسينانىڭ 4 ءتۇرى بار، ولار تەگىن. حالىق تا بۇعان ۇيرەندى. 4 ميلليون Pfizer ۆاكسيناسى ساتىپ الىندى. ولار بالالار مەن جۇكتى ايەلدەردىڭ دەنى ساۋ بولسىن دەگەن ماقساتتا الىندى. بۇل - ءبىزدىڭ سالىق تولەۋشىلەردىڭ اقشاسى. ءبىز وعان سانالى تۇردە بارامىز. تاۋەلسىز قازاقستاننىڭ ءومىر ءسۇرۋىن قالاساق، وندا مەملەكەت جاساپ جاتقان بارلىق يگىلىكتى دۇرىس قابىلداۋىمىز قاجەت»، - دەدى ول.
«مەنتالدى دەنساۋلىق جانە COVID-19» كونفەرەنسياسىندا قازاقستان، رەسەي، تۇركيا، وزبەكستان، قىرعىزستان، ءازىربايجان، تاجىكستان، بولگاريا، پولشا جانە ليتۆانىڭ ۇزدىك ماماندارى ءسوز سويلەدى.
اتالمىش كونفەرەنسيانى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ پسيحيكالىق دەنساۋلىق عىلىمي-تاجىريبەلىك ورتالىعى، رەسەي فەدەراسياسى دەنساۋلىق ساقتاۋ مينيسترلىگىنىڭ ۆ.م. بەحتەريەۆ اتىنداعى پسيحياتريا جانە نيەۆرولوگيا ۇلتتىق مەديسينالىق زەرتتەۋ ورتالىعى جانە پسيحيكالىق دەنساۋلىق سالاسىندا جۇمىس ىستەيتىن ماماندار قاۋىمداستىعى جانە قازۇمۋ تۇلەكتەرىنىڭ قاۋىمداستىعى بىرلەسىپ ۇيىمداستىردى.