الدانعان ادامدار قۇقىق قورعاۋ ورگاندارىنا جۇگىنبەيدى، ويتكەنى ولار جالعان قۇجاتتاردى ساتىپ الۋ ارقىلى زاڭدى بۇزعاندارىن تۇسىنەدى.
قازاقستاندىق پوليسەيلەر ينتەرنەتتە ۆاكسينالاۋ پاسپورتى مەن پتر-تەست انىقتاماسىن ساتاتىن 46 جارنامانى انىقتاپ، بىرنەشە شەتەلدىك رەسۋرستى بۇعاتتاۋعا جىبەرگەن، دەپ حابارلايدى Almaty-akhamy.kz قازاقپارات cىلتەمە جاساپ.
ىشكى ىستەر مينيسترلىگىنىڭ باسپا ءسوز وكىلى شۇعىلا تۇرلىبەكتىڭ ايتۋىنشا، پوليسيانىڭ بارلىق بولىمشەلەرىندە ارنايى مونيتورينگتىك توپتار قۇرىلىپ، ولار ينتەرنەت جەلىسىندە، الەۋمەتتىك جەلىلەردە جانە مەسسەندجەرلەردە، جەرگىلىكتى پابليكتەردە، جارنامالىق سايتتاردا ورنالاستىرىلاتىن جالعان قۇجاتتاردى ساتۋ جونىندەگى حابارلاندىرۋلاردى انىقتاپ، پىسىقتاپ جاتىر.
«پوليسيا وسىنداي 46 جارنامانى انىقتادى. وندا جالعان ۆاكسينا پاسپورتتارى، وڭ نەمەسە تەرىس تەست ناتيجەلەرى بار انىقتامالار اقشاعا ۇسىنىلادى. اتالعان رەسۋرستاردا رەسەي فەدەراسياسىندا، ۋكراينادا، ءۇندىستاندا جانە اقش-تا مەديسينالىق انىقتامالار مەن ۆاكسيناسيا سەرتيفيكاتتارىن ساتۋ تۋرالى حابارلاندىرۋلار بار»، - دەيدى ءىىم وكىلى.
شۇعىلا تۇرلىبەكتىڭ ايتۋىنشا، كيبەرقىلمىسپەن كۇرەس ورتالىعىنىڭ ماماندارى الدىن الا تولەم الۋعا باعىتتالعان الاياقتىق سحەمالاردىڭ قالاي ىسكە اساتىنىن انىقتاعان.
الاياقتار قارماققا ىلىنگەن ازاماتتارعا ۆاكسينانىڭ ءبىرىنشى كومپونەنتىن العانى تۋرالى مەملەكەتتىك ورگانداردىڭ رەسمي رەسۋرستارىنا جاتپايتىن بوگدە پوشتا جاشىكتەرىنەن حابارلاما جىبەرەدى. وسىعان الدانعان ازاماتتار 2 كومپونەنتتىڭ انىقتاماسى ءۇشىن سۇراعان اقشانى اۋدارىپ جىبەرەدى. اقشا تۇسكەن بويدا جارناما يەسى بايلانىس اياسىنان جوعالادى.
«ءبىرقاتار جاريالانىمداردى تالداۋ الاياقتاردىڭ شەتەلدىك بانكتەردىڭ كارتالارىن قولدانعانىن انىقتادى، ال «ساتۋشىلار» ۇنەمى وزگەرىپ تۇراتىن ۆيرتۋالدى تەلەفون نومىرلەرىن ءجيى قولدانادى. الدانعان ادامدار قۇقىق قورعاۋ ورگاندارىنا جۇگىنبەيدى، ويتكەنى ولار جالعان قۇجاتتاردى ساتىپ الۋ ارقىلى زاڭدى بۇزعاندارىن تۇسىنەدى. انىقتالعان شەتەلدىك رەسۋرستاردى قازاقستان اۋماعىندا بۇعاتتاۋ ءۇشىن ۋاكىلەتتى ورگانعا جىبەرىلدى. ىشكى ىستەر مينيسترلىگى ازاماتتارعا قىلمىستىق پروسەسكە قاتىسۋدان اۋلاق بولۋعا جانە مۇنداي ارەكەتتەردەن ساقتاندىرۋعا شاقىرادى»، - دەيدى ۆەدومستۆونىڭ باسپا ءسوز وكىلى.