تاۋەلسىزدىك كۇنى №87 ورتا مەكتەپ وقۋشىلارى «جاس ۇلان» مەن «جاس قىران» قاتارىنا قوسىلدى. مەكتەپ ۇجىمى 1-سىنىپتىڭ 215 وقۋشىسىنىڭ انتىن قابىلداپ، قازاقستانداعى بارشا مەكتەپ وقۋشىلارىنىڭ باسىن بىرىكتىرەتىن «جاس ۇلان» جانە «جاس قىران» ۇيىمىنىڭ سيمۆوليكاسىن تاقتى.
بۇل - «جاسقىراندىقتاردىڭ» پاندەميا اياقتالعاننان كەيىنگى العاشقى سالتاناتتى جيىنى. ۇيىم وسكەلەڭ ۇرپاقتى جوعارى ادامگەرشىلىك-رۋحاني قۇندىلىقتار، تولەرانتتىلىق، دەموكراتيالىق جانە ءوزارا تۇسىنىستىك مادەنيەتى قاعيداتتارى نەگىزىندە وتانسۇيگىشتىككە تاربيەلەيدى.
«ۇيىم قازاقستان حالقىنىڭ تاريحىن، مادەنيەتىن، ءتىلىن ءبىلۋ نەگىزىندە رۋحاني الەۋەتتى قالىپتاستىرۋمەن، وقۋشىلاردىڭ قوعامدىق بەلسەندىلىگىن، تانىمدىق بەلسەندىلىگىن ارتتىرۋمەن، بالالاردىڭ شىعارماشىلىعى مەن الەۋمەتتىك باستامالارىن دامىتۋمەن اينالىسادى. مەكتەپ ومىرىندەگى ەرەسەكتەر مەن بالالار اراسىنداعى قارىم-قاتىناستى ۇيلەستىرۋگە جاۋاپتى. سونداي-اق، بالالار مەن جاسوسپىرىمدەر ۇيىمدارى مەملەكەتتىك جانە قوعامدىق قۇرىلىمدارمەن، ۇەۇ-مەن الەۋمەتتىك ارىپتەستىكتە العاشقى قادامدار جاساپ جاتىر»، – دەيدى №87 ورتا مەكتەپ ديرەكتورى ۇلار مىلتىقبايەۆا.
ۇيىم قىزمەتىنىڭ قورىتىندىسى جىل سايىن شىعارىلادى، مەكتەپتىڭ ۇزدىك "جاسۇلاندىقتارى" جالپىمەكتەپتىك، وبلىستىق، رەسپۋبليكالىق «جاس ۇلان» كەڭەسىنە مۇشە بولا الادى. وقۋ جىلىنىڭ سوڭىندا ۇزدىك بىرلەستىككە «ۇزدىك توپ» اتاعى مەن ديپلومى، سونىمەن قاتار قازاقستاننىڭ تاريحي جەرلەرىنە ساياحات نەمەسە جازعى ساۋىقتىرۋ لاگەرىنە جولداما بەرىلەدى. وقۋدا جانە قوعامدىق جۇمىستاردا ەرەكشە جەتىستىكتەرگە جەتكەن مەكتەپ وقۋشىلارى «جاس ۇلان» التىن كىتابىنا ەنەدى. ەڭ بەلسەندىلەر كورنەكتى قوعام جانە ساياسي قايراتكەرلەرمەن كەزدەسۋگە، ترەنينگتەرگە، سەمينارلارعا جانە ەلدەگى ەڭ جاقسى لاگەرلەردە كوشباسشىلىق ساباقتارعا قاتىسۋعا مۇمكىندىك الادى.
وسى ورايدا ايتا كەتەيىك، «جاس ۇلان» جانە «جاس قىران» ءبىرىڭعاي بالالار مەن جاسوسپىرىمدەر ۇيىمى» رەسپۋبليكالىق قوعامدىق بىرلەستىگى 2011 جىلى قۇرىلعان.