تارازدا قوعام بەلسەندىلەرى مەن بلوگەرلەردىڭ اتىن جامىلعان قىلمىستىق توپ قۇرىقتالدى.
ۇيىمداسقان توپتىڭ سەركەسى ءوزىن بەلگىلى بلوگەرمىن دەپ كاسىپكەرلەردەن اقشا بوپسالاپ كەلگەن. سونداي-اق ول جامبىلدىق جاستاردى تاربيەلەيمىن دەگەن جەلەۋمەن قايىرىمدىلىق قورىن قۇرادى. قوعامدىق قورعا قارجى تارتۋ ءۇشىن كاسىپكەرلەردى جارنا تولەۋگە مىندەتتەگەن. كونبەگەندەرىنە كۇش كورسەتىپ قورقىتقان، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
قىلمىس الەمىندەگى توپتاردان قورعايمىز دەپ قوسىمشا اقشا الىپ وتىرعان. ال قىلمىسىن بۇركەمەلەۋ ءۇشىن الەۋمەتتىك جەلىدە ادىلەتتىلىكتى جاقتاۋشى رەتىندە بەلسەندى بولىپ كورىنگەن. ۇزاق ۋاقىت ۇلتتىق قاۋىپسىزدىك كوميتەتىنىڭ نازارىندا بولعان توپتىڭ 9 مۇشەسى ۇستالدى. ءۇي-جايلارىن ءتىنتۋ بارىسىندا قاڭتار وقيعاسى كەزىندە قولدى بولعان قارۋلار تابىلدى. كالاشنيكوۆ اۆتوماتىنان باستاپ، قىسقا ۇڭعىلى مىلتىق پەن بىرنەشە تاپانشا تاركىلەنگەن. 38 دانا پىشاق پەن ەسىرتكى زاتتارى دا بار.
«سونىمەن قاتار قىلمىستىق توپتان ەكى كەلىدەن استام ەسىرتكى تاركىلەندى. قىلمىستىق توپقا قاتىسۋشىلارعا قاتىستى بوپسالاۋ، قارۋ مەن ەسىرتكىنى زاڭسىز ساقتاعانى ءۇشىن 12 قىلمىستىق ءىس قوزعالدى. كۇدىكتىلەر ۋاقىتشا ۇستاۋ يزولياتورىنا قامالدى. تەرگەۋ جالعاسۋدا»، - دەيدى ق ر ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.