تۋنيستە جاسوسپىرىمدەر اراسىندا ۇستەل تەننيسىنەن الەم چەمپيوناتىندا قازاقستاندىق الان قۇرمانعالييەۆ ارالاس سىندا مىسىرلىق حانا گودامەن بىرگە جەڭىمپاز اتاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان ۇستەل تەننيسى فەدەراسياسىنان ءمالىم ەتكەنىندەي، قازاقستاندىق-مىسىرلىق جۇپ فينالدا پورتۋگاليالىق تياگو ابيودانا – يسپانيالىق ماريا بەرزوسادان باسىم ءتۇستى.
«بۇل – تاريحي جەتىستىك! الان قۇرمانعالييەۆ الەم چەمپيونى اتاندى. بۇل – قاجىرلى ەڭبەك پەن سپورتشىنىڭ ءوز ىسىنە بەرىلگەنىنىڭ جەمىسى. الان جىل بويى ۇزبەي جاتتىعىپ، شەبەرلىگىن جەتىلدىرە وتىرىپ، حالىقارالىق جارىستاردا 19 مەدالعا قول جەتكىزدى. بۇگىن قازاقستان ۇستەل تەننيسى تاريحىندا العاش رەت الەم چەمپيونى اتاندى. بۇل سپورت تۇرىنەن ەلىمىز جاڭا حالىقارالىق دەڭگەيگە كوتەرىلدى. بۇل ءبارىمىز ءۇشىن اسا ماڭىزدى. چەمپيوندى تاربيەلەگەن باپكەر ەلميرا الييەۆاعا العىسىمدى بىلدىرەمىن. الان مەن بارلىق جانكۇيەرلەردى قۇتتىقتايمىن. ءبىزدىڭ سپورتشىمىزبەن ماقتانامىز!»، دەدى قازاقستان ۇستەل تەننيسى فەدەراسياسىنىڭ پرەزيدەنتى دانيار ابۋلعازين.
ە. الييەۆا – قازاقستان ۇستەل تەننيسى قۇراماسىنىڭ باس باپكەرى ءارى الاننىڭ جەكە جاتتىقتىرۋشىسى. ول الاندى جەتى جاسىنان بەرى جاتتىقتىرىپ كەلەدى.