اقراپ جۇبانوۆتىڭ 95 جىلدىعىنا ارنالعان كورمە ۇلتتىق مادەنيەتتى دارىپتەيدى
ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە قازاق بەينەلەۋ ونەرىنىڭ كاسىبي دەڭگەيگە جەتۋىنە، ونەردىڭ ءار سالاسى بويىنشا تۇراقتى ءبىلىم الۋ جۇيەسىن قالىپتاستىرۋعا وزىندىك ۇلەسىن قوسقان سۋرەتشى-پەداگوگ، قوعام قايراتكەرى، ق ر سۋرەتشىلەر وداعىنىڭ مۇشەسى اقراپ جۇبانوۆتىڭ 95 جىلدىعىنا ارنالعان رەسپۋبليكالىق كورمە اشىلدى.
بۇل كورمەگە الماتى، استانا، اقتوبە، شىمكەنت، تاراز، وسكەمەن، تالدىقورعاننان جانە الماتى وبلىسىنان 120 سۋرەتشى قاتىسۋدا. كەسكىندەمە، گرافيكا، ءمۇسىن، قولدانبالى ونەردەن باس-اياعى 150-گە جۋىق تۋىندى قويىلعان.
– كورمەنىڭ ەرەكشەلىگى – 1963-1992 جىلدار ارالىعىندا سۋرەتشى-پەداگوگ اقراپ قۇدايبەرگەن ۇلى باسشىلىق ەتكەن ن.ۆ. گوگول اتىنداعى الماتى كوركەمسۋرەت ۋچيليششەسىندە ءار كەزەڭدە ءبىلىم العان تۇلەكتەر ۇستازعا تاعزىم رەتىندە ءوز تۋىندىلارىن كورەرمەن نازارىنا ۇسىنىپ وتىر. بۇل كورمەدە تاريحتىڭ وتكەن سارىنى مەن بۇگىنگى اقيقاتىندا 85 جىلدىق تاريحى بار ءبىلىم ورداسىمەن تاعدىرى تىكەلەي بايلانىستى ونەر ساڭلاقتارىنىڭ شىعارماشىلىقتارى زامان اعىمىنا قاراي ساباقتاسىپ، قازاق بەينەلەۋ ونەرىنىڭ ەداۋىر وركەندەۋ ۇردىسىنە ۇلەس قوسقان سۋرەتشىلەردىڭ تۇلعالىق بەينەسى ايقىندالادى. ەكسپوزيسيادا سۋرەتشىلەردىڭ بەينەلەۋ مەن قولدانبالى ونەرىنىڭ ءاربىر جانردا رەاليستىك، ابستراكسيالىق، اۆانگاردتىق، مينيماليزمدىك، كونسەپتۋالدىق مانەردەگى كوركەمدىك يدەيالارىن، زاماناۋي كوركەم شىعارماشىلىقتىڭ اۆتورلىق مانەرىن كەڭىنەن تانۋعا مۇمكىندىك بەرەدى، – دەيدى كورمە جەتەكشىسى گۇلنار قۋاندىق قىزى.
ءيا، بۇگىندە سول ونەردىڭ قارا شاڭىراعىندا تاربيەلەنىپ، سۋرەتشى اتانعان تۇلەكتەردىڭ ىشىندە ەسىمدەرى تاريحتا التىن ارىپپەن جازىلعان اعا بۋىن ونەر ساڭلاقتارى كورمەدە ومىرلىك تاجىريبەسىن، ىشكى الەمىن، وزىندىك تۇلعالىق مانەرىن، كرەاتيۆتى وي-تۇجىرىمىن، وزگەشە پوتەنسيالدارىن ورتاعا سالىپ، ماعىنالى دا ءماندى تۋىندىلارىن ۇسىنادى. سۋرەتشىلەردىڭ شىعارمالارى ۇلتتىق تاريحتى، مادەنيەتتى، ءسالت-داستۇردى دارىپتەيدى، بۇگىنگى كۇنگى الەۋمەتتىك تاقىرىپتاردان سىر شەرتەدى، وي-سانانى سان تاراپقا جەتەلەيتىن كومپوزيسيالىق يدەيالارى، ونداعى ديناميكالىق ۇندەستىك جانە ۋاقىت كەڭىستىگىندەگى بولمىس دارىپتەلەدى.
سۋرەتشى-پەداگوگ اقراپ قۇدايبەرگەن ۇلىنىڭ اكەسى قازاق زيالى ازاماتتارىنىڭ ءبىر، عالىم-لينگۆيست پروفەسسورى، تۇرىكتانۋشى، پەداگوگ قۇدايبەرگەن قۋان ۇلى جۇبانوۆ (1899-1938). ا.ق.جۇبانوۆ 1949 جىلى ن.ۆ. گوگول اتىنداعى الماتى كوركەمسۋرەت ۋچيليششەسىن، 1958 جىلى لەنينگراد قالاسىنداعى ۆ.ي.مۋحين اتىنداعى ءۆحپۋ-دى بىتىرگەن.
اقراپ جۇبانوۆتىڭ 95 جىلدىعىنا وراي ۇيىمداستىرىلعان كورمە جەلتوقساننىڭ سوڭىنا دەيىن جالعاسادى.