ۇلتتىق كينونى قولداۋ مەملەكەتتىك ورتالىعىنىڭ قارجىلاندىرۋمەن ءار جىلدارى تۇسىرىلگەن 29 تولىقمەتراجدى فيلم دايىن تۇر.
ولاردىڭ جارتىسىنىڭ ءوندىرىسى ەندى عانا اياقتالىپ جاتسا، ەرتەرەكتە تۇسىرىلگەن كەي تۋىندىلار ءتۇرلى سەبەپكە بايلانىستى ءالى دە پروكاتقا شىقپاعان، دەپ حابارلايدى Almaty-akshamy.kz «ۇلتتىق كينونى قولداۋ مەملەكەتتىك ورتالىعى» كەاق باسپا ءسوز قىزمەتىنە سىلتەمە جاساپ.
وسىعان بايلانىستى كيونوورتالىقتىڭ باسقارما ءتوراعاسى قۇرمانبەك جۇماعالي بۇل فيلمدەردى 2024 جىلى جارىققا شىعارۋ مۇمكىندىكتەرىن تالقىلادى. ونىڭ ايتۋىنشا، ۇلتتىق بىرلىگىمىز بەن يدەولوگيامىزدى دارىپتەيتىن كينولاردىڭ كورەرمەنگە قولجەتىمدى بولۋى ماڭىزدى.
«مەنەن «ءبىزدىڭ ۇلتتىق فيلمدەرىمىز قايدا؟» دەپ سۇراپ جاتادى. بۇل وتە ورىندى ساۋال. سەبەبى، سوڭعى جىلدارى مەملەكەتىمىز كينەماتوگرافيا سالاسىنا قوماقتى قارجى بولگەنىمەن، كورەرمەن ونىڭ ناتيجەسىن كورمەي وتىر. فيلمدەر تۇسىرىلەدى، الايدا كوبى پروكاتقا شىقپايدى. ءار تۋىندى ءتۇسىرىلىپ بولعان سوڭ سورەدە شاڭ باسىپ قالماۋى ءتيىس. پروكات بولسىن، فەستيۆال بولسىن، ستريمينگ پلاتفورمالار، تەلەارنالار ارقىلى بولسىن – وتاندىق كورەرمەنگە قولجەتىمدى بولۋى كەرەك. بۇل حالىقتىڭ اقشاسىنا تۇسىرىلگەن فيلمدەر. سوندىقتان، جاۋاپكەرشىلىكتى ءتۇسىنىپ، ونىڭ كورەرمەنگە جەتۋىنە كۇش سالۋ قاجەت»، - دەدى قۇرمانبەك جۇماعالي.
ەكرانعا شىقپاعان تۋىندىلاردىڭ قاتارىندا ءتىپتى 2019 جىلعى كونكۋرستىڭ ناتيجەسىندە تۇسىرىلگەن فيلمدەر بار. اۆتورلاردىڭ كوبى فەستيۆالدەرگە قاتىسامىن دەپ ۇزاق ۋاقىت ءجۇرىپ قالعاندارىن ايتتى. بۇعان قوسا تاريحي وقيعالارعا نەگىزدەلگەن، ۇلى تۇلعالاردىڭ مەرەيتويىنا ارنالعان جوبالار دا جەتەرلىك. بۇل فيلمدەردىڭ پرەمەراسى ۇلكەن وقيعاعا اينالىپ، حالىققا دۇرىس جەتۋى اسا ماڭىزدى دەپ اتاپ ءوتتى كيونورتالىق باسشىسى.
«كەيبىر كينوگەرلەر بار. باستاپقىدا مەملەكەت قاراجاتىنا فيلم ءتۇسىرۋ ءۇشىن وزدەرىنىڭ جوبالارىن اسىرا ماقتاپ، كونكۋرستان جولداما العان. ءبىراق سوڭىندا جوبالارىن ودان ءارى ىلگەرىلەتۋ جۇمىستارىنان وزدەرى باس تارتقان. بۇل دەگەنىمىز، ولاردىڭ مەملەكەتتىك قارجىعا دەگەن تەك تۇتىنۋشىلىق كوزقاراسىن كورسەتەدى. ەگەر ءفيلمنىڭ كورەرمەنگە جەتۋى اۆتورلاردىڭ وزىنە قىزىق بولماسا، ونى ءتۇسىرىپ نە قاجەت؟ مۇنداي كومپانيالار مەن اۆتورلار بويىنشا ورتالىق بولاشاقتا ءبىر شەشىم شىعاراتىن بولادى»، - دەدى كينوورتالىقتىڭ باسقارما ءتوراعاسى.
ارينە، اۆتورلىق فيلمدەردىڭ ورنى بولەك. ولار كەمىندە ءبىر جىل حالىقارالىق فەستيۆالدەردى ارالاپ، ۋاقىتىن وتكىزىپ الادى. ءارى مۇنداي تۋىندىلاردىڭ پروكاتقا شىعۋى دا قيىن. سەبەبى، قاراپايىم كورەرمەندەر اۆتورلىق كينولارعا كوپ بارا بەرمەيدى. دەگەنمەن، ونى ىزدەپ ءجۇرىپ كورەتىن دە كينوسۇيەر قاۋىم بار. سوندىقتان، اۆتورلىق فيلمدەردىڭ دە پروكاتقا شىعۋىنا مۇمكىندىك بەرىلۋ كەرەكتىگى ەرەكشە ايتىلدى. تىزىمگە اسحات كۋچينچيرەكوۆتىڭ «باۋىرىنا سالۋ»، دارحان تولەگەنوۆتىڭ «اعايىندى»، كەنجەبەك شايقاقوۆتىڭ «ايقاي»، سەرىك اپرىموۆتىڭ «اۋىل» جانە تاعى باسقا فيلمدەر كىرەدى. اتالمىش كارتينالاردىڭ دا پروكاتى كەلەسى جىلعا جوسپارلانىپ وتىر.
جاقسى جاڭالىعىمەن قۋانتىپ جۇرگەن جوبالار دا جوق ەمەس. مىسالى، جۋىردا عانا جارىققا شىققان «Burkit» ەكشن ءفيلمى ءبىر ايدا وتاندىق پروكاتتان قوماقتى قاراجات جينادى. ال «ەۆا. باتىر قىز» سەكىلدى دەرەكتى كارتينا سوڭعى جارتىجىلدىقتا 13 حالىقارالىق كينوفەستيۆالدەن جۇلدەلى ورالدى. باقىتتاس سانيتاستىڭ «تەزەك» كارتيناسى ءقازىر ايگىلى «Netflix» كومپانياسىمەن كەلسىسسوزدەر جۇرگىزۋدە. ءادىلحان ەرجانوۆتىڭ «ءمۇيىزتۇمسىق» اتتى كينوسىنىڭ الەمدىك پرەمەراسى كەلەسى جىلى بەدەلدى روتتەردام كينوفەستيۆالىندە وتەدى. قورىتا كەلگەندە جينالعان قاۋىم دايىن تۇرعان 29 جوبا 2024 جىلى تولىعىمەن جارىققا شىعۋى كەرەك دەگەن شەشىمگە كەلدى.
«ءاربىر ءفيلمنىڭ ەڭ باستى جەڭىسى – ونىڭ ءوز كورەرمەنىن تابۋى. ءبىزدىڭ ماقساتىمىز – ۇلتتىق كينونى حالىققا قولجەتىمدى ەتۋ. سەبەبى، وتاندىق كينو ەڭ اۋەلى ءوزىمىزدىڭ كورەرمەنگە قاجەت! سول ءۇشىن بارلىعىمىز – كينوورتالىق، فيلم اۆتورلارى جانە ديستريبيۋتەرلەر بىرىگىپ جۇمىس ىستەۋىمىز كەرەك»، - دەپ قورىتىندىلادى قۇرمانبەك جۇماعالي.