ۇستاز بولۋ – بالا كەزىمدەگى ارمانىم.
الماتى قالاسى احمەت بايتۇرسىنوۆ اتىنداعى №139 مەكتەپ-گيمنازياسىنىڭ باستاۋىش سىنىپ ءمۇعالىمى مەيرامگۇل بەگوۆا ۇستاز بولۋدى بالا كۇننەن ارمانداعان. بىلىكتى مامان وقۋشىلاردى ءبىلىم نارىمەن سۋسىنداتىپ، بولاشاققا جول كورسەتۋ ۇستازعا جۇكتەلگەن ۇلكەن جاۋاپكەرشىلىك دەپ بىلەدى. ۇستازدار كۇنى قارساڭىندا Almaty-akshamy.kz ءتىلشىسى مۇعالىممەن اڭگىمە ءوربىتتى.
ءمۇعالىم مەيرامگۇل گابدۋلدا قىزى ۇستازدىق ۇلكەن جاۋاپكەرشىلىكتى جۇكتەيتىنىن جانە ادال شاكىرت تاربيەلەۋ ۇستاز ءۇشىن ۇلكەن مارتەبە ەكەنىن ايتادى.
«الماتىدا ناعاشى اپايلارىم جوعارعى وقۋ ورىندارىندا ساباق بەرەدى. بالا كەزىمنەن سول كىسىلەرگە ەلىكتەپ ءوستىم. ۇستاز بولۋ – بالا كەزىمدەگى ارمانىم. سول ارمانىم ورىندالعانىنا قۋانامىن. ۇستاز بولۋ –ۇلكەن جاۋاپكەرشىلىك. ءسىزدىڭ الدىڭىزدا ومىرگە قۇشتار ەل بولاشاعى وتىر. الدىڭا كەلگەن بۇلدىرشىندەردىڭ ءبىلىمىن ارتتىرىپ، ىزگىلىككە ۇيرەتۋ، ادامگەرشىلىكتىڭ قادىر-قاسيەتىن ءتۇسىندىرۋ، بولاشاققا جول كورسەتۋ ۇستازعا جۇكتەلگەن ۇلكەن جاۋاپكەرشىلىك ەكەنىن تۇسىنەمىن»، - دەيدى ول.
ول شاكىرتتەرىنىڭ ءبىلىمدى، ادال بولىپ ءوسۋىن وزىنە مارتەبە سانايدى. سوندىقتان شاكىرتتەرىنىڭ ساپالى ءبىلىم الۋى جولىندا ايانباي ەڭبەك ەتۋدە.
«وقۋشى ءبىلىم نارىمەن سۋسىنداپ، ەڭبەكتى اقتاسا، ادال شاكىرت بولىپ تاربيەلەنسە – بۇل ۇستاز ءۇشىن ۇلكەن مارتەبە. ۇستاز بالاعا – اتا-انا، دوس، جاناشىر، اقىلشى، ۇلگى بولار تۇلعا». – دەيدى ءمۇعالىم.
مەيرامگۇل گابدۋلدا قىزى مۇحتار اۋەزوۆتىڭ «ۇستاز بولۋ ءوز ۋاقىتىڭدى اياماي، وزگەنىڭ باقىتىن ايالاۋ» دەگەن ءسوزى ۇستازداردىڭ ەڭبەگىنە، سارقىلماس قۋاتىنا، قاجىماس قايراتىنا بەرگەن باعا دەپ سانايدى. ونىڭ ايتۋىنشا، ءار ادام پەداگوگ ماماندىعىن يگەرگەنىمەن اركىم ۇستازدىقتى الىپ جۇرە المايدى. سوندىقتان ول وقۋشىلارىن ماماندىق تاڭداۋدا ءاردايىم ۇلكەن جاۋاپكەرشىلىكپەن قاراۋعا شاقىرادى ەكەن.
«ۇستازدىڭ ءجۇرىس تۇرىسى، مىنەز-قۇلقى ءتىپتى كيىم ۇلگىسى دە بالالارعا ۇلگى. بالا الدىنداعى ۇستازىنا ءوزىنىڭ ومىردەگى ايناسىنداي قارايدى»، - دەيدى م. بەگوۆا.