پرەزيدەنت تاپسىرماسى ورىندالىپ، ۇستازداردىڭ جالاقىسى ارتتى
ق ر پرەزيدەنتى قاسىم-جومارت توقايەۆتىڭ ۇستازدار جالاقىسىن كوبەيتۋ تۋرالى تاپسىرماسى ورىندالدى، دەپ حابارلايدى اlmaty-akshamy.kz پرەزيدەنت باسپا ءسوز قىزمەتىنىڭ Telegram پاراقشاسىنا سىلتەمە جاساپ.
ەستەرىڭىزدە بولسا، مەملەكەت باسشىسى قاسىم-جومارت توقايەۆ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا ۇستازدار جالاقىسىنا قاتىستى ماسەلە كوتەرگەن بولاتىن.
«ءبىلىم سالاسىنداعى باستى ماسەلەنىڭ ءبىرى – ۇستازدار جالاقىسىنىڭ ازدىعى. مەن 2021 جىلدىڭ قاڭتار ايىنان باستاپ مۇعالىمدەردىڭ ەڭبەكاقىسىن 25 پايىزعا كوبەيتۋ جونىندە شەشىم قابىلدادىم. جالاقى مولشەرى الداعى ۋاقىتتا دا ارتا بەرەدى. بۇل ماقساتقا الداعى ءۇش جىلدا قوسىمشا 1،2 ترلن تەڭگە بولىنەدى»، - دەگەن ەدى ق ر پرەزيدەنتى.
سونىمەن 2021 جىلدىڭ 1 قاڭتارىنان باستاپ مادەنيەت سالاسىنداعى ارناۋلى مەكتەپتەر مەن كوللەدجەر قىزمەتكەرلەرىنىڭ ەڭبەكاقىسى 25 پايىزعا ءوستى.
2022 جىلدىڭ 1 قاڭتارىنان باستاپ جالاقى تاعى 25 پايىزعا كوبەيدى.
مەملەكەتتىك ءبىلىم بەرۋ ۇيىمدارىنىڭ مۇعالىمدەرىنە ساباقتان تىس سپورت ساباقتارىن وتكىزگەنى ءۇشىن بازالىق لاۋازىمدىق جالاقىنىڭ 100 پايىزى مولشەرىندە قوسىمشا اقى تولەۋ جۇيەسى ەنگىزىلدى.
دەنە شىنىقتىرۋ جانە سپورت سالاسىنداعى مامانداندىرىلعان مەكتەپتەر مەن كوللەدجدەر قىزمەتكەرلەرىنىڭ جالاقىسى 25 پايىزعا ءوستى.