قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى: سارىم ايدوس ءامىروللا ۇلى، سۋلەيمەنوۆا جۇلدىز دوسبەرگەن قىزى، قۇسپان ايگۇل سايفوللا قىزى، الماتى قالاسى ءماسليحاتىنىڭ دەپۋتاتى بولەكبايەۆا رايحان چانتى قىزى، «الماتى مەملەكەتتىك ەنەرگەتيكا جانە ەلەكتروندى تەحنولوگيالار كوللەدجىنىڭ» ديرەكتورى، الماتى قالاسى قوعامدىق كەڭەسىنىڭ مۇشەسى تايتۋلەيەۆ تولەۋعالي مۇحامەتجان ۇلى جانە امانات پارتياسىنىڭ الماتى قالاسى اۋەزوۆ اۋداندىق فيليالىنىڭ ءتوراعاسى وردابايەۆا نايليا التىنبەك قىزى وتكەن اپتادا «ۇستازدار ۇيىنە» كەلدى، دەپ حابارلايدى Almaty-akshamy.kz
«ورلەۋ» – الماتى قالاسى بويىنشا كاسىبي دامۋ ينستيتۋتىنىڭ ديرەكتورى سادۆاكاسوۆا رايسا اجدار قىزى قوناقتاردى كۇتىپ الىپ، كۋرس ءوتىپ جاتقان اۋديتوريالاردى ارالاتىپ، مۇعالىمدەرمەن كەزدەستىردى.
حالىقتىڭ جاعدايىن جاقسارتۋدى كوزدەيتىن رەفەرەندۋم تۋرالى تۇسىندىرمە جۇمىسىمەن كەلگەن ءماجىلىس دەپۋتاتتارى قولدانىستاعى اتا زاڭعا ەنگىزىلەتىن وزگەرىستەر مەن تولىقتىرۋلار ازاماتتاردىڭ سۇرانىسىنا نەگىزدەلىپ، جالپى قوعامنىڭ مۇددەسىنە باعىتتالعانى تۋرالى باياندادى.
اتاپ ايتساق، جەر جانە ونىڭ قويناۋىنداعى بايلىقتار مەن تابيعي رەسۋرستار حالىققا تيەسىلى، قازاقستان رەسپۋبليكاسىنىڭ پرەزيدەنتى ءوز وكىلەتتىگىن جۇزەگە اسىرۋ كەزەڭىندە ساياسي پارتيادا بولماۋعا ءتيىس، قازاقستان رەسپۋبليكاسى پرەزيدەنتىنىڭ جاقىن تۋىستارىنىڭ ساياسي مەملەكەتتىك قىزمەتشىلەر لاۋازىمدارىن اتقارۋعا قۇقىعى جوق، كونستيتۋسيالىق سوت، تاعى دا باسقا جاڭا قازاقستاننىڭ كەلبەتىن ايقىنداي تۇسەتىن وزگەرىستەرگە جان-جاقتى توقتالدى.
پرەزيدەنتتىڭ وكىلەتتىگىن كۇشەيتۋ ەمەس، ىقپالدى پارلامەنت قۇرۋ ارقىلى قاراپايىم حالىققا ەسەپ بەرەتىن ۇكىمەت قالىپتاستىرۋدى كوزدەيتىن بۇكىلحالىقتىق رەفەرەندۋم ەرەكشەلىكتەرىن تايعا تاڭبا باسقانداي ناقتىلاپ تۇسىندىرگەن لاۋازىمدى قوناقتار «ۇستازدار ءۇيىنىڭ» قىزمەتكەرلەرىمەن دوڭگەلەك ۇستەل باسىندا كەزدەسىپ، مۇنداعى ءتۇيىندى ماسەلەلەردىڭ ءتيىمدى شەشىمىن قاراستىرۋعا ۋادە بەردى.
ەلىن، جەرىن، تاريحىن قاستەرلەيتىن، قوعامداعى تۇراقتىلىق پەن تىنىشتىقتى قولدايتىن ءاربىر ازامات جاڭا قازاقستاننىڭ بولاشاعى ءۇشىن 5 ماۋسىمدا وتەتىن رەفەرەندۋمعا قاتىسىپ، ءوز تاڭداۋىن جاسايدى. بۇل – ءبىزدىڭ ازاماتتىق بورىشىمىز!