بۇگىن الماتىداعى رەسپۋبليكا سارايىندا ۇستازدار كۇنىنە ارنالعان سالتاناتتى شارا ءوتتى.
الماتى قالاسىنىڭ اكىمى مۇعالىمدەردى كاسىبي مەرەكەلەرىمەن قۇتتىقتادى، دەپ حابارلايدى aqshamnews.kz
مەرەكەلىك جيىنعا قالامىزدىڭ ءارتۇرلى مەكتەپتەرىندە ءبىلىم بەرىپ جۇرگەن 24،1 مىڭ ۇستازدىڭ اراسىنان ەڭبەك ارداگەرلەرى، ۇستازدىق اۋلەت وكىلدەرى، جاس ۇرپاققا ءبىلىم بەرىپ جۇرگەن مۇعالىمدەر قاتىستى.
الماتى اكىمى ەربولات دوسايەۆ ۇستازداردىڭ ەڭبەگىن، جاس ۇرپاق تاربيەسىندەگى ۇلەستەرىن جوعارى باعالاپ، ريزاشىلىعىن ءبىلدىردى:
- قۇرمەتتى ۇستازدار، سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! ماعجان جۇمابايەۆتىڭ: «التى الاشتىڭ باسى قوسىلسا، توردەگى ورىن – مۇعالىمدىكى» دەگەن ءسوزى ۇستازدىڭ قوعامداعى مارتەبەسىن جوعارى باعالاپ كورسەتەدى، - دەدى ول. بۇگىنگى مەرەكەدە بارشاڭىزعا شىن جۇرەكتەن العىس ايتامىن. سىزدەردىڭ كاسىبي شەبەرلىكتەرىڭىز، توزىمدىلىكتەرىڭىز جانە ىسىڭىزگە ادالدىعىڭىز - ءبىز ءۇشىن ۇلكەن ماقتانىش. شاكىرتتەرىڭىزدىڭ جەتىستىگى قۋانتا بەرسىن، دەندەرىڭىزگە ساۋلىق، ومىرلەرىڭىزگە باقىت، سارقىلماس كۇش-قۋات تىلەيمىن!
اكىم ءسوزىن جالعاي وتىرىپ، ۇستازدىق كاسىپتىڭ مارتەبەسىن ارتتىرۋعا باعىتتالعان باستامالاردى قولداۋ جانە دامىتۋ جۇمىستارىنىڭ جالعاسىپ جاتقانىن ايتتى. ول بيىل 440 ۇستاز بىلىكتىلىكتى ارتتىرۋ باعدارلاماسىنان وتەتىنىن اتاپ ءوتتى. سونىمەن قاتار، 40 ديرەكتور مەن ادىسكەر جىل سوڭىنا دەيىن مالايزيا، جۇڭگو، گەرمانيا جانە پولشا ەلدەرىندەگى جەتەكشى ءبىلىم بەرۋ مەكەمەلەرىنە تاعىلىمدامادان وتۋگە اتتانادى.
«الماتى مەكتەپتەرى» باعدارلاماسى اياسىندا 70 ۇستاز Marshall Cavendish سەرتيفيكاتتالعان باعدارلامالارى بويىنشا وقىپ، وقۋشىلاردىڭ فۋنكسيونالدى ساۋاتتىلىعى مەن سيفرلىق داعدىلارىن دامىتۋدا. بۇعان قوسا، 300 پەداگوگ شەتەلدە بىلىمدەرىن جەتىلدىرىپ، 50 ءمۇعالىم وسى جىلدىڭ سوڭىنا دەيىن وڭتۇستىك كورەيادا حالىقارالىق تاعىلىمدامادان وتەدى.
اكىم ەربولات دوسايەۆ ءسوز سوڭىندا «الماتى ۇستازى» قالالىق بايقاۋىنىڭ جەڭىمپازدارىن ماراپاتتادى. كونكۋرسقا قاتىسقان 2 مىڭ ۇستازدىڭ اراسىنان ۇزدىك دەپ تانىلعان 7 پەداگوگ شەتەلدە تاعىلىمدامادان ءوتۋ سەرتيفيكاتىمەن ماراپاتتالدى، ال گران-پري يەگەرى ەرنۇر بەيسەمبايەۆ 5 ميلليون تەڭگە كولەمىندەگى سەرتيفيكاتقا يە بولدى.
«ۇزدىك ءبىلىم بەرۋ ۇيىمى» اتاعى المالى اۋدانىنىڭ №15 گيمنازياسىنا بەرىلدى. الماتى اكىمى مەكتەپ ديرەكتورىنا ءبىلىم بەرۋ پروسەسىن جاقسارتۋ ءۇشىن 68 ميلليون تەڭگە كولەمىندەگى گرانت تابىس ەتتى.
سونىمەن قاتار، 5 ەڭبەك ارداگەرى ق ر وقۋ-اعارتۋ مينيسترلىگىنىڭ «ەڭبەك ارداگەرى» مەدالىمەن جانە قالا اكىمىنىڭ ءبىلىم سالاسىنىڭ دامۋىنا قوسقان ەرەكشە ۇلەسى ءۇشىن العىس حاتتارىمەن ماراپاتتالدى.
سالتاناتتى شارانىڭ ءسانىن وپەرا ساحناسىنىڭ جۇلدىزدارى مەن تانىمال ەسترادا ورىنداۋشىلارىنىڭ ونەرى كەلتىردى.
