جەتىسۋ اۋدانىنا قاراستى كەمەل ىقشاماۋدانىنىڭ مادەنيەت ۇيىندە وتكەن مەرەكەلىك شاراعا جاس وتباسىلار، اعا بۋىن وكىلدەرى، قوعام قايراتكەرلەرى جانە ونەرپازدار قاتىستى.
ءىس-شارا اكىمدىك پەن الەۋمەتتىك مەكەمە وكىلدەرىنىڭ قۇتتىقتاۋ سوزدەرىنەن باستالدى.
الماتى قالاسى جەتىسۋ اۋدانى اكىمدىگى قوعامدىق دامۋ ءبولىمىنىڭ باسشىسى رۇستەم يسمايىلوۆ تۇرعىنداردى وتباسى كۇنىمەن جانە الداعى قالا كۇنىمەن شىن جۇرەكتەن قۇتتىقتادى. سونىمەن قاتار، ول الماتى قالاسى اكىمىنىڭ ورىنباسارى ازامات قالدىبەكوۆتىڭ اتىنان «مەرەيلى وتباسى» قالالىق بايقاۋىنىڭ جەڭىمپازدارىنا العىس حاتتار مەن ەستەلىك سىيلىقتار تابىستادى.
الماتى قالاسىنىڭ جەتىسۋ اۋدانىندا تۇراتىن قانايەۆتار وتباسى بيىل التىن تويىن – 50 جىلدىق نەكەسىن اتاپ وتۋدە. ءدال وسى جۇپ «مەرەيلى وتباسى» قالالىق بايقاۋىندا ەكىنشى ورىنعا يە بولدى. بايقاۋدىڭ ماقساتى – وتباسىلىق قۇندىلىقتاردى ناسيحاتتاۋ جانە قازاقستاندىق وتباسىنىڭ وڭ بەينەسىن قالىپتاستىرۋ. ۇستاز بەن قۇرىلىسشىنىڭ ماحابباتقا تولى ادەمى تاريحى مىقتى ءارى باقىتتى وداققا ۇلاستى. ورىنشا مەن نۇرعالي قانايەۆتار ءتورت قىز تاربيەلەپ، توعىز نەمەرە ءسۇيىپ وتىر.
– تاتۋلىعى جاراسقان وتباسىنىڭ قۇپياسى قاراپايىم: ءبىر-بىرىن تىڭداۋ، ءوزارا تۇسىنىستىك پەن قۇرمەت كورسەتۋ جانە قاتەلىكتەر ءۇشىن دەر كەزىندە كەشىرىم سۇراۋ ماڭىزدى، – دەپ ءبولىستى جۇپ.
وتباسى كۇنى مەرەكەسى اياسىندا كوپبالالى انالار دا اۋدان اكىمدىگىنەن ماقتاۋ قاعازدارىنا يە بولدى.
مەرەكەلىك كونسەرتتىك باعدارلاما كورەرمەندەردىڭ كوڭىلىنەن شىقتى. ساحنادا انا تۋرالى، ماحاببات جايلى اندەر شىرقالىپ، «كوڭىل اشار» كۇيى ورىندالدى. بەلسەندى ۇزاق ءومىر ءسۇرۋ ورتالىعىنىڭ قىزمەت الۋشىلارى ۇلتتىق بيلەردى ورىنداپ، كورەرمەندەردى قۋانىشقا بولەدى.