قىزىلوردادا كولىك ۇرىسى قىلمىس ۇستىندە ۇستالدى
ول ۇرلانعان زاتتاردى الەۋمەتتىك جەلىلەر ارقىلى ساتقان، – دەپ حابارلايدى almaty-akshamy.kz
قىزىلوردا قالاسىندا اۆتوكولىك زاتتارىن ۇرلاۋدى كاسىپ ەتىپ، تابىس كوزىنە اينالدىرىپ كەلگەن ۇرى قۇرىقتالدى. ول كەزەكتى ۇرلىق ۇستىندە ۇستالدى. 5 قالا تۇرعىنىنىڭ كولىكتەرىنە ۇرلىققا تۇسكەن كۇدىكتى قىزىلوردا وبلىسى شيەلى اۋدانىنىڭ تۇرعىنى بولىپ شىقتى.
19 جاستاعى جىگىت اۆتوكولىكتەردىڭ اشىق قالعانىن پايدالانىپ، ىشىنە زاڭسىز كىرۋ ارقىلى اۆتوماگنيتولا مەن وزگە دە اۆتوكولىك اكسەسسۋارلارىن ۇرلاپ كەلگەن. بۇدان بولەك، ول ۇرلانعان زاتتاردى الەۋمەتتىك جەلىلەر ارقىلى جارنامالاپ، ساتىپ وتىرعان.
جابىرلەنۋشىلەرگە تيەسىلى ايعاق زاتتار تاركىلەندى.
بۇگىنگى كۇنى بۇل كۇدىكتىنىڭ قالا اۋماعىندا تىركەلگەن وسىعان ۇقساس باسقا دا قىلمىسقا قاتىسى بار-جوعى تەكسەرىلىپ جاتىر. كۇدىكتى ۋاقىتشا ۇستاۋ يزولياتورىنا قامالىپ، تەرگەۋ ارەكەتتەرى جالعاسىپ جاتىر.