جىل سايىن 4 اقپاندا حالىقارالىق وبىرعا قارسى كۇرەس وداعىنىڭ (UICC) باستاماسىمەن دۇنيەجۇزىلىك وبىرعا قارسى كۇرەس كۇنى اتاپ وتىلەدى. ماقساتى - حالىقتىڭ ونكولوگيالىق اۋرۋلاردىڭ پروفيلاكتيكاسى جانە ەرتە انىقتاۋ تۋرالى حاباردار بولۋىن ارتتىرۋ، ءوز دەنساۋلىعىنا جاۋاپكەرشىلىكپەن قاراۋدى قالىپتاستىرۋ، قولجەتىمدى سكرينينگتىك تەكسەرۋلەر تۋرالى حاباردار ەتۋ.
قازاقستاندا جىل سايىن 40 مىڭعا جۋىق ادام وبىرعا شالدىعادى. 2023 جىلدىڭ قورىتىندىسى بويىنشا ونكولوگيالىق ەسەپتە 218 مىڭ قازاقستاندىق تۇر، ونكولوگيادان 12 مىڭنان استام ادام قايتىس بولدى.
قازاقستاندا ەڭ كوپ تارالعان وبىردىڭ تۇرلەرى: ءسۇت بەزى وبىرى، كولورەكتالدىق وبىر، وكپە وبىرى، اسقازان وبىرى، جاتىر موينى وبىرى.
قازاقستاندا ونكولوگيالىق اۋرۋلاردى ەمدەۋ جانە دارى-دارمەكپەن قامتاماسىز ەتۋ تەگىن مەديسينالىق كومەكتىڭ كەپىلدىك بەرىلگەن كولەمىنە (تمككك) كىرەتىنىن ايتا كەتكەن ءجون.
ەرەسەكتەرگە ونكولوگيالىق كومەكتى رەسپۋبليكالىق ۇيىمدار – "قازاق ونكولوگيا جانە راديولوگيا عىلىمي-زەرتتەۋ ينستيتۋتى" اق، "ۇلتتىق عىلىمي ونكولوگيالىق ورتالىق" اق، 15 ونكولوگيالىق ورتالىق، كوپبەيىندى اۋرۋحانالاردىڭ جانىنداعى 5 ونكولوگيالىق بولىمشە (اقتوبە ق. م. وسپانوۆ اتىنداعى بقمۋ جانىنداعى ونكولوگيا بولىمشەسى، جەزقازعان قالاسىنداعى وا جانىنداعى ونكولوگيالىق بولىمشە، اقمولا وبلىسىنىڭ كوا قۇرامىنداعى بولىمشە، تۇركىستان وبلىستىق كوپبەيىندى اۋرۋحاناسىنىڭ قۇرامىنداعى ونكولوگيا بولىمشەسى، سولتۇستىك قازاقستان وبلىسىنداعى كوپبەيىندى اۋرۋحانانىڭ جانىنداعى ونكولوگيالىق بولىمشە) جۇزەگە اسىرادى. ەگەر پاسيەنتتە ونكولوگيالىق جانە گەماتولوگيالىق اۋرۋعا كۇدىك تۋىنداسا، مساك-تا پاسيەنتتەرگە 18 جۇمىس كۇنى ىشىندە كونسۋلتاسيا جانە تەكسەرۋ الۋعا مۇمكىندىك بەرەتىن "جاسىل جول" باعىتى ەنگىزىلدى.
قازىرگى ۋاقىتتا قازاقستان حالقى ءۇشىن ونكولوگيالىق سكرينينگتىڭ 3 ءتۇرى تەگىن جۇرگىزىلەدى، ولار ەمحانالاردا قولجەتىمدى:
- ءسۇت بەزى وبىرىنا سكرينينگ (40 جاستان 70 جاسقا دەيىنگى ايەلدەر، 2 جىلدا 1 رەت)
- جاتىر موينى وبىرىنا سكرينينگ (30 جاستان 70 جاسقا دەيىنگى ايەلدەر، 4 جىلدا 1 رەت)
- كولورەكتالدىق وبىرعا سكرينينگ (ەرلەر مەن ايەلدەر 50 جاستان 70 جاسقا دەيىن، 2 جىلدا 1 رەت).
2024 جىلى قازاقستاندا جاتىر موينى وبىرىنىڭ دامۋ سەبەبى بولىپ تابىلاتىن ادام پاپيللوماۆيرۋسىنا (HPV) قارسى ەرىكتى ۆاكسيناسيالاۋ باستالعانىن ەستەرىڭىزگە سالا كەتەيىك. 11 جاستاعى قىزدار تەگىن ۆاكسيناسيا الا الادى.
وبىرمەن كۇرەستە ءار ادام ءۇشىن سكرينينگتىك تەكسەرۋلەردەن ۋاقتىلى ءوتۋ ماڭىزدى ەكەنىن ءاردايىم ەستە ۇستاعان ءجون، ەرتە دياگنوز ءومىردى ساقتايدى.