Fly Arystan كەي رەيستەردىڭ نەلىكتەن ۇشپاي قالعانىن ءتۇسىندىردى
Fly Arystan اۋە كومپانياسى 19 ناۋرىز كۇنى بىرنەشە رەيستىڭ شەگەرىلۋىنە بايلانىستى جەلى قولدانۋشىلارىنىڭ شاعىمىنا تۇسىنىكتەمە بەردى، دەپ حابارلايدى اlmaty-akshamy.kz.
جەلى قولدانۋشىلارى 19 ناۋرىزدا Fly Arystan اۋە كومپانياسى قىزمەت كورسەتۋگە ءتيىس بولعان نۇر-سۇلتان – قوستاناي رەيسىنەن سەبەپسىز تۇسىرىلگەنىن ايتىپ شاعىمدانعان بولاتىن.
اۋە كومپانياسى اتالمىش شاعىم بويىنشا پىكىر ءبىلدىردى.
قازاقپارات جولداعان ساۋالعا بەرگەن جاۋابىندا كومپانيا وكىلدەرى 19 ناۋرىز كۇنى نۇر-سۇلتان - قوستاناي باعىتىنداعى كس 7341 رەيسى ورىن سانى شەكتەۋلى بورتپەن ۇشقانىن حابارلادى.
«تەحنيكالىق سەبەپ بويىنشا جانە باسشىلىققا الىنۋعا ءتيىستى قۇجاتتارعا سايكەس، اتالعان اۋە كەمەسىندە جولاۋشىلار سانى بويىنشا 110 ورىندىق ۋاقىتشا شەكتەۋ قويىلدى. مۇنداي شەشىم قابىلدانعاننان كەيىن كومپانيا وسى رەيسكە بيلەت العان جولاۋشىلاردىڭ بارىنە قوڭىراۋ شالىپ، باسقا كۇندەردى ۇسىندى. 19 ناۋرىزدا ۇشا الماعان جولاۋشىلارعا باسقا كۇندەرگە قايتا برونداۋ ۇسىنىلدى. سونداي-اق قوناق ۇيدەن ورىن، تاماق جانە ترانسفەر ۇسىنىلدى. قايتا برونداۋعا كەلىسپەگەن جولاۋشىلارعا اۋە بيلەتىنىڭ ءۇش ەسە قۇنىنا تەڭ ۆاۋچەر جازىلدى»، - دەلىنگەن كومپانيا جاۋابىندا.
اۋە كومپانياسى وكىلدەرى اتالعان ولقىلىق ءۇشىن جولاۋشىلاردان كەشىرىم سۇراعانىن ايتىپ وتىر.
«ۇشۋ قاۋىپسىزدىگى ءبىزدىڭ باستى باسىمدىق بولعاندىقتان، وسىنداي شەشىم قابىلداندى»، - دەيدى FlyArystan ماماندارى.
سونداي-اق، اۋە كومپانياسى الماتى-ورال باعىتىنداعى رەيسپەن بولعان جاعدايعا تۇسىنىكتەمە بەردى.
ۇشاق 26 ناۋرىزدا ۇشىپ شىققانىمەن، اۋا رايىنىڭ قولايسىزدىعىنا بايلانىستى اتىراۋعا قونعان بولاتىن.
«26 ناۋرىزدا الماتى-ورال باعىتىندا ۇشىپ شىققان كسح 7165 رەيسى ورال قالاسىنداعى قولايسىز مەتەوجاعدايلارعا بايلانىستى اتىراۋ قالاسىنا قونعانىن حابارلايمىز. رەيس سول كۇنگى ساعات 14.30-عا قالدىرىلدى. كەيىن رەيس ۋاقىتى ساعات 21.00-گە دەيىن ۇزارتىلدى.ءبىراق اقىرى توقتاتىلدى. جولاۋشىلارعا سۋسىن مەن تاماق، جاتار ورىن ۇسىنىلدى. سونىمەن قاتار، جولاۋشىلارعا بيلەت قۇنىن ساتىپ العان ورىنعا قايتارىپ الۋعا بولاتىنى ايتىلعان»، - دەلىنگەن جاۋاپتا.