ۇشتوبەدە بۇزاقىلار زيراتتى قيراتتى: پرەزيدەنت مينيسترگە تاپسىرما بەردى

الەۋمەتتىك جەلىدە كۋاگەرلەردىڭ ۆيدەوسى تارادى

مەملەكەت باسشىسى قاسىم-جومارت توقايەۆ الماتى وبلىسىندا پراۆوسلاۆ زيراتىن قيراتقان بۇزاقىلاردى قىلمىستىق جاۋاپقا تارتۋدى تاپسىردى، دەپ حابارلايدى Almaty-akshamy.kz Sputnik قازاقستان سايتىنا سىلتەمە جاساپ.

«ىشكى ىستەر ءمينيسترى ە.تۇرعىمبايەۆقا ۇشتوبە قالاسىنداعى (الماتى وبلىسى) پراۆوسلاۆ زيراتىن قيراتقان بۇزاقىلاردى زاڭ جۇزىندە قىلمىستىق جاۋاپكەرشىلىككە تارتۋ تۋرالى تاپسىرما بەرىلدى»، – دەپ جازدى پرەزيدەنت Twitter-دە.

بۇعان دەيىن تالدىقورعان ماڭىندا ورنالاسقان ۇشتوبەدە بەلگىسىز بىرەۋلەر پراۆوسلاۆ زيراتىن تالقانداعانى حابارلاندى.
الەۋمەتتىك جەلىدە كۋاگەرلەردىڭ ۆيدەوسى تارادى. كادردا تۋىستارىنىڭ قابىرىنە كەلگەن ەر ادام مەن ايەل وزدەرى كورگەن جايتتى باياندايدى. اينالا ءقابىر ۇستىندەگى تاقتايشالار، سىنعان تەمىر مەن اعاش كىرەستەر، قورشاۋلار شاشىلعان.

اۆتور ۆيدەو قاراتال اۋدانىنىڭ اكىمشىلىك ورتالىعى سانالاتىن ۇشتوبە قالاسى ماڭىندا تۇسىرىلگەنىن ايتتى. قالا تۇرعىندارى جەرگىلىكتى پوليسياعا ارىزداندى.

وبلىستىق پوليسيا دەپارتامەنتى ارىزدىڭ تىركەلگەنىن راستادى. ۆانداليزم فاكتىسى بويىنشا قىلمىستىق ءوندىرىس قوزعالدى.

«قىلمىستىق كودەكستىڭ 294-بابى «ۆانداليزم» بويىنشا قاراستىرىلعان ءىستى تەرگەۋمەن قاراتال اۋداندىق پوليسياسى اينالىسىپ جاتىر. وسى قىلمىسقا قاتىسى بار ادامداردى انىقتاۋ بويىنشا جەدەل ىزدەستىرۋ شارالارى جۇرگىزىلۋدە»، – دەپ مالىمدەدى الماتى وبلىسى پوليسيا دەپارتامەنتىنىڭ باسپا ءسوز قىزمەتى.