ۇشقىشتار اۋە ۇرىسىنىڭ ەلەمەنتتەرىن پىسىقتادى

زىمىراندى-بومبالىق سوققىلاردى قولدانۋدىڭ جاڭا تاسىلدەرى پىسىقتالدى

جاۋىنگەرلىك دايىندىق جوسپارىنا سايكەس اۋە قورعانىسى كۇشتەرىنىڭ اۆياسيالىق بازالارىندا تاجىريبەلى نۇسقاۋشىلاردىڭ باسشىلىعىمەن وقۋ-جاتتىعۋ ۇشۋلارى ءوتتى، دەپ حابارلايدى Almaty-akshamy.kz.

وقۋ-جاۋىنگەرلىك ۇشۋلار كەزىندە جويعىش-ۇشقىشتار اۋە ۇرىسىن جۇرگىزۋ، اۋە نىسانالارىن قولعا ءتۇسىرۋ تاسىلدەرىن پىسىقتاپ، كۇردەلى جانە جوعارى پيلوتاج فيگۋرالارىن ورىندادى. سونداي-اق زىمىراندى-بومبالىق سوققىلاردى قولدانۋدىڭ جاڭا تاسىلدەرى پىسىقتالدى.

«اۋە قورعانىسى كۇشتەرىندە وقۋدىڭ قازىرگى كەزەڭىندە جاۋىنگەرلىك دايارلىقتىڭ قارقىنى ەداۋىر ءوستى. تيىسىنشە، ەكيپاجدىڭ ۇشۋ ساعاتتارى دا ارتتى. سۋ-30سم كوپفۋنكسيونالدى جويعىش ۇشقىش تاپسىرمالارىن ورىنداۋ كەزىندە مانيەۆرلىك اۋە ۇرىسىنىڭ ەلەمەنتتەرىن پىسىقتاۋعا، شابۋىلداۋ جانە قورعانىس ارەكەتتەرىنە ەرەكشە نازار اۋدارىلدى»، – دەپ ءتۇسىندىردى 50185 اسكەري ءبولىمى اۆياسيالىق ەسكادريلياسىنىڭ كومانديرى، پودپولكوۆنيك احمادي ورازعالي.

ۇشۋ كۇندىز-تۇنى ءار ءتۇرلى مەتەورولوگيالىق جانە كليماتتىق جاعدايدا جۇرگىزىلدى. ۇشۋ، قونۋ مينيمالدى ارالىقتار مەن قاشىقتىقتاردا ەكى ۇشاقپەن جانە  جەكە جۇزەگە اسىرىلدى.

ءاربىر ۇشۋدىڭ الدىندا قامتاماسىز ەتۋ بولىمشەلەرىنىڭ قاتىسۋىمەن جەردە مۇقيات دايىندىق بولدى. اتالعان شارالار ەلدىڭ اۋە كەڭىستىگىن قورعايتىن ۇشۋ جانە ينجەنەرلىك-تەحنيكالىق قۇرامداردىڭ كاسىبي شەبەرلىگىن ارتتىرۋعا باعىتتالعان.