ءقازىر ەلىمىزدە سۋ تاسقىنىنا قارسى جۇمىستار قارقىندى جۇرگىزىلۋدە
ەلىمىزدىڭ توتەنشە جاعداي قىزمەتىندە شتات سانى ارتادى. ءورت ءسوندىرۋ بولىمشەلەرى 380 ادامعا، قۇتقارۋ ستانسيالارى 220 ادامعا، اپاتتار مەديسيناسى ورتالىعى 94 ادامعا، «قازسەلدەنقورعاۋ» مەكەمەسى 39 ادامعا كوبەيىپ جاتىر. بۇل جايىندا ۇكىمەت باسشىسى ءاليحان سمايىلوۆ مالىمەت بەردى، دەپ حابارلايدى Almaty-akshamy.kz.
-بۇگىندە ادامي فاكتورلارمەن قاتار، تەحنوگەندىك سيپاتتاعى وقيعالارعا بايلانىستى قاۋىپسىزدىك ماسەلەسى مەن توتەنشە جاعدايلارعا دەر كەزىندە ارەكەت ەتۋ الدىڭعى قاتارعا شىعىپ وتىر.
ءقازىر ەلىمىزدە سۋ تاسقىنىنا قارسى جۇمىستار قارقىندى جۇرگىزىلۋدە.
سونداي-اق جاز مەزگىلى دە جاقىنداپ كەلەدى، ياعني ءورت ءقاۋپى دە ارتا تۇسەدى.
تۇركيا مەن سيريادا بولعان جويقىن جەر سىلكىنىستەرى مىڭداعان ادامنىڭ ءومىرىن قيىپ، كوپشىلىگى زارداپ شەگىپ، باسپاناسىز قالدى. بۇل جاعداي ءار قازاقستاندىقتىڭ قابىرعاسىن قايىستىردى.
قازا بولعانداردىڭ وتباسىلارىنا كوڭىل ايتامىن، ال تۇركيا جانە سيريا حالقىنا وسىناۋ قيىن-قىستاۋ كەزەڭدە اۋىزبىرشىلىك پەن سابىر تىلەيمىن.
سونىمەن قاتار وسىنداي قيىن ساتتە باۋىرلاس تۇرىك حالقىنا قول ۇشىن سوزىپ، اسا ءقاۋىپتى جاعدايدا جۇمىس ىستەپ جۇرگەن قازاقستاندىق قۇتقارۋشىلارعا ريزاشىلىعىمدى بىلدىرگىم كەلەدى.
بۇل وقيعالاردىڭ بارلىعى ءبىزدىڭ ءارتۇرلى جاعدايلارعا دايىن بولۋ ءۇشىن جەدەل ارەكەت ەتۋ كۇشتەرىن ۇلعايتىپ، ولاردى ءتيىستى جابدىقتارمەن قامتاماسىز ەتۋ ىسىنە اسا كوڭىل ءبولۋىمىزدى قاجەت ەتىپ وتىر.
وسىعان بايلانىستى ق ر ۇكىمەتى «قازاقستان رەسپۋبليكاسى توتەنشە جاعدايلار مينيسترلىگىنىڭ كەيبىر ماسەلەلەرى تۋرالى» قاۋلى قابىلدادى. قۇجاتقا سايكەس، قازاقستاندا ءتجم-نىڭ جاڭا اسكەري ءبولىمى قۇرىلۋدا. ول اقتوبە قالاسىندا ورنالاسادى. جاڭا ءبولىمنىڭ شتاتى – 880 ادام.
رەسپۋبليكا بويىنشا ءتجم-نىڭ شىعىس قازاقستان، الماتى جانە قاراعاندى وبلىستارىندا ءۇش اسكەري ءبولىمى بار. باتىس ايماقتا كولەمدى قۇتقارۋ قۇرىلىمدارى جوق.
بۇدان باسقا، تجم قىزمەتتەرىنىڭ شتات سانى، اتاپ ايتقاندا، ءورت ءسوندىرۋ بولىمشەلەرى 380 ادامعا، قۇتقارۋ ستانسيالارى 220 ادامعا، اپاتتار مەديسيناسى ورتالىعى 94 ادامعا، «قازسەلدەنقورعاۋ» مەكەمەسى 39 ادامعا كوبەيۋدە.
جالپى تجم قاتارى 1 613 اداممەن تولىقتى.
وسى شارالاردىڭ بارلىعى توتەنشە جاعدايلار بويىنشا جەدەل ارەكەت ەتۋ دەڭگەيىن، اۆاريالىق-قۇتقارۋ جۇمىستارىن جۇرگىزۋدىڭ تيىمدىلىگىن، ەلدىڭ ءورت قاۋىپسىزدىگىن، شۇعىل مەديسينالىق كومەك كورسەتۋدى، سونداي-اق ازاماتتىق قورعانىس اسكەري بولىمدەرى مەن سەلدەن قورعاۋ قۇرىلىستارىنىڭ تولىققاندى جۇمىسىن قامتاماسىز ەتەدى.
ۇكىمەت وسى باعىتتاعى جۇمىسىن جالعاستىرادى. ءبىز جەدەل قىزمەتتەردى ماتەريالدىق-تەحنيكالىق جاراقتاندىرۋ، قۇتقارۋشىلاردىڭ ەڭبەكاقىسىن كوتەرۋ جونىندە شارالاردى ودان ءارى دە قابىلدايمىز.
الەمدەگى توسىن وقيعالار ادامداردىڭ قاۋىپسىزدىگى بارىنەن دە جوعارى ەكەنىن كورسەتىپ وتىر، - دەپ جازدى پرەمەر-مينيستر Facebook پاراقشاسىندا.