الەۋمەتتىك جەلىدە ۇشاقتىڭ اپاتتى ەسىگىن نەگىزسىز اشىپ جىبەرگەن جولاۋشىنىڭ ۆيدەوسى تارادى.
قازاقستاننىڭ اۆياسيا اكىمشىلىگى جاعدايدىڭ ءمان-جايىن انىقتاۋ ءۇشىن ءتيىستى تەكسەرۋ جۇرگىزەدى، دەپ حابارلايدى Almaty-akshamy.kz
«2023 جىلعى 23 جەلتوقساندا «شىمكەنت – الماتى» باعىتى بويىنشا FlyArystan اۋە كومپانياسىنىڭ كس7106 رەيسى جەرگىلىكتى ۋاقىت بويىنشا ساعات 01:19-دا قونعاننان كەيىن جولاۋشى اپاتتىق ەسىكتى اشتى. بورت تەكسەرىلىپ، ۇشۋلاردى ورىنداۋعا رۇقسات ەتىلدى. جولاۋشى شارا قولدانۋ ءۇشىن ىشكى ىستەر مينيسترلىگى قىزمەتكەرلەرىنە تاپسىرىلدى»، - دەلىنگەن ازاماتتىق اۆياسيا كوميتەتىندە.
كوميتەتتىڭ حابارلاۋىنشا، جاعدايدىڭ ءمان-جايىن انىقتاۋ ءۇشىن قازاقستاننىڭ اۆياسيا اكىمشىلىگى ءتيىستى تەكسەرۋ جۇرگىزەدى.
«تەكسەرۋ ەسىكتى ءوز بەتىمەن اشقان جولاۋشىعا دا، اۆتوتراپ بەرۋگە جاۋاپتى اۋەجاي قىزمەتتەرىنە دە قاتىستى جۇرگىزىلەتىن بولادى»، - دەلىنگەن مالىمەتتە.